Мабiльныя зладзеi

Источник материала:

Намеснiк начальнiка аддзела ўнутраных спраў па ахове Мiнс- кага метрапалiтэна, маёр мiлiцыi Вiктар Радзевiч гаворыць:

— За апошнiя пяць месяцаў толькi ў метро было ўчынена 45 крадзяжоў, 28 пацярпелых — жанчыны. Злачынцы ў асноўным крадуць кашалькi i мабiльныя тэлефоны.

Прычым мабiльнiкi зладзеi збываюць па-рознаму, у чым я ўпэўнiлася на горкiм вопыце маёй блiзкай знаёмай. Зусiм нядаўна яна вырашыла купiць сабе новы мабiльны тэлефон. Стары ёй ужо надакучыў: мадэль вельмi ж прымiтыўная.

— Куплю «Фiлiпс-530», з усiмi прыбамбасамi, а то ўжо сiл няма з гэтай развалюхай хадзiць, — казала яна.

Хутка сяброўка мела ўжо новы тэлефон.

— Колькi каштуе? — запыталася я.

— Танны, мне вельмi пашанцавала, — задаволена казала сяброўка. — Купiла па аб’яве, праўда без дакументаў, але гэта не мае значэння.

Аказалася, што сяброўка набыла новы апарат проста з рук: у нейкага незнаёмага хлопца, прычым прадала i свой стары тэлефон, таксама яму. Каштавала гэта новае набыццё «з усiмi прыбамбасамi» трыццаць долараў.

Але ж задаволенай новай пакупкай дзяўчына была ўсяго паўтара тыдня, пакуль на «новы» мабiльнiк не патэлефанавалi з мiлiцыi.

Атрымалася, што тэлефон крадзены.

— Мяне ў аддзяленне мiлiцыi выклiкалi, — са слязамi на вачах шаптала сяброўка, — толькi не хапала, каб вырашылi, што гэта я скрала.

Супрацоўнiкi мiлiцыi злодзеем маю знаёмую не палiчылi, проста папрасiлi расказаць, як усё было, а мабiльны тэлефон забралi, каб вярнуць законнаму ўладальнiку.

Вiктар Уладзiмiравiч Радзевiч кажа, што пакрыць страту мая знаёмая не можа, таму што ў дадзеным выпадку нiякiх правоў не мае.

У кожнага мабiльнага тэлефона ёсць спецыяльны электронны нумар, гаворыць Вiктар Уладзiмiравiч, — але многiя карыстальнiкi мабiльнай сувязi нават не ведаюць аб яго iснаваннi. А менавiта па гэтаму нумару i вылiчваюцца скрадзеныя апараты. Калi пацярпелы прыходзiць да нас i адразу называе электронны нумар, знайсцi тэлефон намнога прасцей. Але, як правiла, так не бывае. Таму прыходзiцца вызначаць «выратавальны» нумар праз мабiльную сетку, у якой зарэгiстраваны тэлефон.

Гэта гiсторыя стала для мяне каштоўным урокам, мяркую, што не толькi для мяне.

P.S. Калi вы не ведаеце свайго электроннага нумара, набярыце на клавiшах тэлефона камбiнацыю *#06#.