5 мiльёнаў беларусаў папрацуюць на ўмацаванне здароўя...

Источник материала:

Грошы, якiя сёлета будуць зароблены на рэспублiканскiм суботнiку, пойдуць на ўмацаванне здароўя дзяцей, на выратаванне iх жыцця, паведамiў намеснiк прэм’ер-мiнiстра Беларусi Аляксандр Косiнец на ўчарашнiм пасяджэннi рабочай групы па падрыхтоўцы i правядзеннi рэспублiканскага суботнiка 19 красавiка.

Адметна, што ўдзел у сёлетнiм маштабным мерапрыемстве, як чакаецца, прыме больш за 5 мiльёнаў беларусаў. Як падкрэслiў вiцэ-прэм’ер, такой колькасцi ўдзельнiкаў яшчэ не было. Што ж датычыцца размеркавання заробленых на суботнiку сродкаў, то 50 працэнтаў iх накiруюць на цэнтралiзаваную закупку рэанiмабiляў — па два на кожную вобласць i Мiнск, а таксама аднаго — для Рэспублiканскага навукова-практычнага цэнтра "Мацi i дзiця". Мiж iншым, зношанасць рэанiмабiляў, на якiх сёння працуюць медыкi, складае каля 90 працэнтаў. Новыя рэанiмабiлi, зазначыў Аляксандар Косiнец, будуць поўнасцю забяспечаныя сучасным абсталяваннем, а кошт адной такой машыны складае прыблiзна 480 мiльёнаў рублёў.

Другая палова заробленых грошай застанецца ў распараджэннi мясцовых выканаўчых уладаў, а пойдуць гэтыя сродкi на закупку дыягнастычнага абсталявання высокага класа — ультрагукавых апаратаў, эндаскапiчнага абсталявання i iнш. "Адным словам, усё будзе зроблена для таго, каб у абласных дзiцячых бальнiцах дыягнастычнае абсталяванне было на сучасным сусветным узроўнi, таму што ад гэтага залежыць жыццё i здароўе маленькiх грамадзян нашай краiны", — канстатаваў вiцэ-прэм’ер.

Паводле iнфармацыi, якую агучыў Аляксандр Косiнец, па вынiках двух месяцаў гэтага года ў нашай краiне адзiн з самых нiзкiх у свеце ўзроўняў смяротнасцi немаўлят — 4,2 прамiле, а ў Вiцебскай вобласцi i горадзе Мiнску — 2,5—2,7 прамiле. "Мы павiнны iмкнуцца да таго, каб такiх паказчыкаў у нас наогул не было. Тады ў нашай краiны будзе будучае", — сказаў Аляксандр Косiнец.

Як плануецца, сёлета на рэспублiканскiм суботнiку ўдасца зарабiць вялiкiя грошы: паводле слоў вiцэ-прэм’ера, гэтыя сродкi значна перавысяць леташнюю суму. "Чым больш мы заробiм сродкаў, тым больш будзе закуплена абсталявання, тым лепшая стане матэрыяльна-тэхнiчная база аховы здароўя", — падкрэслiў намеснiк прэм’ера. Прычым, ён зазначыў, што правядзенню суботнiка не перашкодзiць нiякае надвор’е, а работы хопiць усiм.

Ігар ШЧУЧЭНКА.