Водаправод усё ж адрамантавалi...

Источник материала:

Рэха публікацыi

У Таiсii Аляксандраўны Бурдзейка з вёскi Баравое Дзяржынскага раёна ў двары прарвала водаправод. Адбылося гэта 10 сакавiка. Старшыня мясцовага СВК паабяцаў дапамогу ў лiквiдацыi прарыву. 13 сакавiка жанчына з мужам (абое — пенсiянеры) выкапалi катлаван, каб можна было дабрацца да труб. Але майстры так i не з’явiлiся. Ужо 17 сакавiка Таiсiя Аляксандраўна патэлефанавала i ў райвыканкам, i ў нашу рэдакцыю.

На наш запыт работнiкi раённага выканаўчага камiтэта адказалi, маўляў, ведаем пра бяду вяскоўцаў (а ў iх была рызыка падтаплення склепа; ваду цалкам нельга было адключыць, бо да водаправода былi падключаны iншыя карыстальнiкi, у тым лiку i дзiцячы садок), будзем прымаць канкрэтныя меры. Аднак 17, 18, 19 сакавiка так нiчога i не змянiлася: рамонтнiкi зноў жа не з’явiлiся. Гэта нам пацвердзiла сама Таiсiя Аляксандраўна, хоць у райвыканкаме запэўнiвалi, што яны павiнны быць ужо на месцы прарыву. Апошнi, нагадаем яшчэ раз, адбыўся за дзесяць дзён да таго. Гэтую сiтуацыю мы i выклалi на старонках газеты 21 сакавiка ў матэрыяле пад назвай "Магчыма, рамонтнiкi яшчэ з’явяцца?.."

24 красавiка рэдакцыя атрымала лаканiчны афiцыйны адказ з Дзяржынскага райвыканкама. "Водаправод у гр. Бурдзейка Т.А., што пражывае ў в. Баравое, адрамантаваны 20 сакавiка 2008 года".

Што застаецца дадаць? Вельмi "парадавалi" тэрмiны як лiквiдацыi самога прарыву (а ўжо як увесь гэты час "радавалiся" гаспадары дома, застаецца толькi здагадвацца), так i рэагавання на выступленне газеты. Тры радкi тэксту можна было аператыўна паведамiць i па тэлефоне. Ды i чаму так доўга вырашалася праблема, мы так i не зразумелi. I яшчэ цiкава: калi б увогуле дапамаглi вырашыць праблему вяскоўцам без удзелу газеты...

Сяргей РАСОЛЬКА.