Ёсць весткi ад Бога

Источник материала:

Фестывалі

У Беларусi могуць паспрачацца з думкай аднаго iспанскага фiльма, таму што добрыя весткi да нас прыходзяць i праз кiно таксама. Дзеля гэтага ўжо чацвёрты раз пройдзе Мiжнародны каталiцкi фестываль хрысцiянскiх фiльмаў i тэлепраграм "Magnificat".

З 17 чэрвеня ў Глыбокiм збяруцца кiнамайстры самых розных краiн, якiя здымаюць свае фiльмы на тэму духоўнага жыцця чалавека. Адкрыццё кiнасвята пройдзе ва Ўдзеле, у францiшканскай парафii, якая была заснаваная ў 1727 годзе. Але цяперашнi касцёл быў адбудаваны ў 1989 годзе намаганнямi парафiян. Будзе што паглядзець гасцям у вёсках Мосар i Iвесь, куды яны спецыяльна паедуць. Але самi конкурсныя прагляды пройдуць у Глыбокiм.

"Самых розных кiнафестываляў мноства. Такiх, як наш, глыбоцкi, няшмат. Magnificat — гэта месца сустрэчы людзей, аб’яднаных адной справай, адной iдэяй, гэта фестываль дабрынi, справядлiвасцi, аптымiзму, мудрасцi i надзеi", — падкрэслiвае ў прывiтаннi старшыня Глыбоцкага райвыканкама М. Кандзерскi. У праграму адабраныя 34 стужкi з 14 краiн свету. Найбольшую колькасць прадставiла Беларусь — 8 фiльмаў. Будзе паказана 7 расiйскiх карцiн, 4 iтальянскiя, 3 польскiя, 2 украiнскiя. Акрамя таго, прыедуць фiльмы з Лiтвы, Латвii, ЗША, Францыi, Канады, Харватыi, Швейцарыi. Упершыню ў беларускiм фестывалi возьмуць удзел Грузiя i Лiван. Трэба адзначыць, што канфесiянальная прыналежнасць стваральнiкаў не была прынцыпам падбору фiльмаў у праграму. Яны адрасаваныя тым людзям, якiя iмкнуцца працаваць над сваё душой, выхоўваючы яе на лепшых прыкладах чалавечых учынкаў i разважаючы пра тое, як захаваць вобраз Божы, якi ёсць у кожным чалавеку. 15 стужак будуць перакладзены на беларускую мову i агучаны — усё-такi ў справах духоўных мае значэнне кожнае слова. Асаблiва, калi яно прамоўлена з душой для многiх людзей адначасова.

"Сучасная супольнасць выхоўваецца на кiно i тэлебачаннi. Таму як кiно, так i тэлебачанню неабходна як мага больш прыкладаў хрысцiянскага жыцця i сведчання..." — адзначае архiбiскуп Тадэвуш Кандрусевiч, Мiтрапалiт Мiнска-Магiлёўскi.

Глыбокiя думкi чакаюць зацiкаўленых у Глыбокiм.

Ларыса ЦIМОШЫК.