Плыў навыперадкi — апынуўся на дне

Источник материала:

Калi б не быў нападпiтку гэты 21-гадовы работнiк Гомельскага хiмзавода, то не паспрачаўся б ён са сваiм сябрам, якi таксама прыняў дозу спiртнога, i дзвюма дзяўчатамi, хто хутчэй праплыве вялікую дыстанцыю. Напарнiк яе адолеў, а завадчанiн апынуўся на дне. Выратавальнiкi на месца здарэння прыбылi праз тры хвiлiны, калi атрымалi сiгнал, ды было позна. Дарэчы, у гэты ж самы дзень служба выратавання на водах горада аказала дапамогу тром чалавекам i дзякуючы гэтаму яны засталiся жывымi. А вось на наступны дзень яны выцягнулi з вады труп навучэнца прафтэхвучылiшча, якi шукалi тры днi. А яшчэ раней, у маi, на вадзе загiнулi два навучэнцы аграрна-тэхнiчнага каледжа, якiя на Сожы святкавалi заканчэнне вучобы. Як расказваюць спецыялiсты абласнога таварыства выратавання на водах, у пераважнай большасцi тапельцамi аказваюцца асобы, якiя любяць выпiць на прыродзе i асвяжыцца затым прахалодай.

Уладзiмiр ПЕРНІКАЎ.

Паваражыла

Недалёка ад вiцебскага чыгуначнага вакзала, на мосце iмя Кiрава, цыганка ранiцай прапанавала паваражыць студэнтцы Вiцебскага дзяржаўнага ўнiверсiтэта. У вынiку завалодала 25 еўра i 1 тысячай расiйскiх рублёў. Дзяўчына звярнулася па дапамогу ў мiлiцыю. Узбуджана крымiнальная справа.

Жонка забiла сякерай

25-гадовая жыхарка Вiцебскага раёна, якая знаходзiцца ў дэкрэтным водпуску па доглядзе дзiцяцi, забiла сякерай свайго 28-гадовага мужа. Устаноўлена, што ўвечары разам выпiвалi ў сваёй кватэры, пасварылiся. Жанчына ўзяла сякеру i ўдарыла мужчыну па галаве. Раённай пракуратурай узбуджана крымiнальная справа.

Аляксандр ПУКШАНСКI.