БАТЭ пайшло ў адрыў

Источник материала:

Спорт-тайм

У суботу адбыліся сем матчаў адзiнаццатага тура чэмпiянату Беларусi ў вышэйшай лiзе. Нагадаем, што матч МТЗ-РIПА — "Шахцёр" з-за ўдзелу салiгорцаў у Кубку Iнтэртота быў згуляны ў сераду, 18 чэрвеня (1:1). Галоўны вынiк тура — перамога БАТЭ ў гасцях у "Лакаматыва", якая дазволiла барысаўчанам аднаасобна акупаваць першае месца ў турнiрнай таблiцы. БАТЭ, дзякуючы галам Ржэўскага, Крыўца i Блiзнюка, ужо за 25 хвiлiн першага тайма дасягнула патрэбнага вынiку. Другi тайм каманды правялi ў рэжыме "адны не могуць, другiя не хочуць". "Гомель" у Магiлёве саступiў мясцоваму "Савiту" з лiкам 0:2. Трэба адзначыць тры выдаленнi ў складзе гасцей. Наступную гульню прапусцяць Кобец, Васiлюк i Кузьмянок. Брэсцкае "Дынама" дома саступiла баявiтаму "Нафтану" — 0:2, а "Вiцебск", "Дарыда" i мiнскае "Дынама" свае хатнiя матчы завяршылi з аднолькавым лiкам 2:1. Жодзiнскае "Тарпеда" i магiлёўскi "Днепр" так i не змаглi змянiць стартавыя нулi на табло.

Бялькевiч пераязджае ў Азербайджан

Лепшы беларускi футбалiст па вынiках апошняга дзесяцiгоддзя Валянцiн Бялькевiч вырашыў прадоўжыць сваю футбольную кар’еру ў бакiнскiм "Iнтэры". Чакаецца, што ў блiжэйшы час Бялькевiч прыедзе ў Баку для падпiсання кантракта. Нагадаем, што Валянцiн Бялькевiч з 1991 па 1996 год выступаў за мiнскае "Дынама", а затым пераехаў у Кiеў, дзе адгуляў за мясцовае "Дынама" да канца мiнулага чэмпiянату. За нацыянальную зборную Бялькевiч правёў 56 матчаў i забiў 10 галоў. Браў удзел у паўфiнале Лiгi чэмпiёнаў сезона 1998/99.

Карстэн зноў выйграла

На веславальным канале ў Познанi (Польшча) завяршыўся чарговы этап Кубка свету па акадэмiчным веславаннi. Зноў пацвердзiла свой высокi клас двухразовая алiмпiйская чэмпiёнка Кацярына Карстэн. У фiнальным заездзе лодак-адзiночак яна паказала вынiк 7 хвiлiн 24,85 секунды, апярэдзiўшы другога прызёра Юлiю Мiхальску з Польшчы на 4,5 секунды. У гэтым сезоне праслаўленая беларуская спартсменка ўжо тройчы ўзнiмалася на самую высокую прыступку п’едэстала на этапах Кубка свету.

"Сiнхронныя" медалi

Беларускiя дуэты выйгралi два медалi на этапе Кубка свету па скачках на батуце ў швейцарскiм горадзе Ароса. Дуэт Мiкалай Казак — Вячаслаў Модэль заваяваў "золата" ў сiнхронных скачках сярод мужчын, а тандэм Таццяна Пятрэня — Кацярына Мiронава стаў бронзавым прызёрам у жаночых спаборнiцтвах.

Несцярэнка перамагае

Беларускiя легкаатлеткi занялi 7-е месца ў розыгрышу Кубка Еўропы ў суперлiзе, якая праходзiла ў французскiм Анесi. У актыве беларусак чатыры першыя месцы. У першы дзень спаборнiцтваў свой высокi клас пацвердзiла алiмпiйская чэмпiёнка Афiн Юлiя Несцярэнка, выйграўшы стометроўку з часам 11,17 секунды. Яна стала першай у гiсторыi беларускай, якая перамагла ў гэтым вiдзе на спаборнiцтвах Кубка кантынента ў суперлiзе. Наталля Шымчук выйграла спаборнiцтвы па кiданнi кап’я, устанавiўшы новы рэкорд Беларусi — 63 м 24 см. У другi дзень турнiру вызначылiся лiдар сезона ў кiданнi молата Аксана Мянькова i яе сяброўка па камандзе Юлiя Леанцюк — у штурханнi ядра. Бронзавая ўзнагарода ў актыве эстафетнага квартэту бягунняў 4х400 метраў Кацярыны Бобрык, Iрыны Хлюставай, Ганны Козак i Юлiяны Юшчанкi.