Вызначаны парадак перадачы ваеннаслужачымі iх акцый

Источник материала:

Вызначаны парадак перадачы ваеннаслужачымі iх акцый Вызначаны парадак перадачы ваеннаслужачымi, асобамi радавога i начальнiцкага складу органаў унутраных спраў, органаў i падраздзяленняў па надзвычайных сiтуацыях, органаў фiнансавых расследаванняў Камiтэта дзяржаўнага кантролю прыналежных iм долей удзелу (акцый, правоў) у статутных фондах камерцыйных арганiзацый у давернае кiраванне на час праходжання ваеннай службы (службы) ва Узброеных Сiлах Рэспублiкi Беларусь, iншых войсках i воiнскiх фармiраваннях краiны, органах унутраных спраў, органах i падраздзяленнях па надзвычайных сiтуацыях i органах фiнансавых расследаванняў Камiтэта дзяржаўнага кантролю.   Гэты парадак вызначаны ў адпаведнасцi з падпiсаным кiраўнiком дзяржавы Указам № 384 "Аб унясеннi змяненняў ва Ўказ Прэзiдэнта Рэспублiкi Беларусь ад 17 сакавiка 2004 г. № 136".

Названыя службовыя асобы павiнны будуць перадаваць у давернае кiраванне прыналежныя iм долi ўдзелу (акцыi, правы) у статутных фондах камерцыйных арганiзацый у парадку, устаноўленым для дзяржаўных служачых. У прыватнасцi, такiя долi ўдзелу (акцыi, правы) павiнны быць перададзены на працягу трох месяцаў у давернае кiраванне адкрытаму акцыянернаму таварыству "Ашчадны банк "Беларусбанк". Давернае кiраванне будзе ажыццяўляцца на падставе дагавора, якi адпавядае тыпавому дагавору, форма якога вызначаецца Саветам Мiнiстраў Рэспублiкi Беларусь. У перыяд давернага кiравання банк будзе праводзiць улiк i капiталiзацыю даходаў па долях удзелу (акцыях, правах) i перадаваць гэтыя даходы толькi пасля спынення асобай службы ў адпаведных органах. Прыняцце Ўказа Прэзiдэнта Рэспублiкi Беларусь накiравана на прадухiленне ўзнiкнення ўмоў для карупцыi, выключэнне магчымасцi ўплыву службовымi асобамi, якiя маюць долi ўдзелу (акцыi, правы) у статутных фондах камерцыйных арганiзацый, на дзейнасць такiх юрыдычных асобаў у сваiх iнтарэсах i з выкарыстаннем службовага становiшча. Указ уступае ў сiлу з дня яго афiцыйнага апублiкавання.

Прэс-служба Прэзiдэнта Рэспублiкi Беларусь.