Графік прайшоў? Будзе даплата

Источник материала:

Пенсіі

У вынiку рашэння аб павелiчэннi пенсiй выдаткi Фонду сацыяльнай абароны на гэтыя мэты ўзрастуць на 96 мiльярдаў i складуць 964 мiльярды рублёў у месяц. Разам з тым, паведамiла ў гутарцы з карэспандэнтам "Звязды" начальнiк галоўнага ўпраўлення пенсiйнага забеспячэння i сацыяльнага страхавання Мiнiстэрства працы i сацыяльнай абароны Валянцiна Каралёва, сама па сабе гэта акалiчнасць нiяк не адаб’ецца на графiках выплат — неабходныя сродкi ў Фондзе ёсць.

Як зазначыла Валянцiна Каралёва, выплата працоўных пенсiй у новых памерах адбудзецца менавiта ў жнiўнi. У прыватнасцi, асобам, графiкi якiх прыйшлiся на днi да прыняцця рашэння аб пераразлiку, плануецца зрабiць даплаты да канца гэтага месяца.

Дарэчы, варта нагадаць, што з 1 жнiўня памер сярэдняй працоўнай пенсii па ўзросце павялiчыўся на 11,2 працэнта — да 408,1 тыс. рублёў. Адначасова памер максiмальнай пенсii па ўзросце непрацуючым пенсiянерам пры стажы 45 гадоў у мужчын або 40 гадоў у жанчын i iндывiдуальным каэфiцыенце 4,0 i вышэйшым складзе 634,2 тыс., максiмальны памер пенсii працуючым пенсiянерам пры такiм жа стажы i каэфiцыенце 1,3 i вышэйшым — 460,4 тыс., а памер мiнiмальнай пенсii па ўзросце пры стажы мужчын 25 i жанчын 20 гадоў — 185 тыс. рублёў.

Пры гэтым, заўважыла Валянцiна Каралёва, памер павелiчэння пенсii ў кожнага пенсiянера атрымаецца розным i будзе залежаць ад стажу i iндывiдуальнага каэфiцыента заробку.

Сяргей ГРЫБ.