Пракуратура i парадак... у пад’ездах

Источник материала:

Ну i ну!

У пад’ездах дамоў Оршы i суседнiх буйных населеных пунктаў работнiкi ЖКГ цяпер убiраюць часцей. А ўсё дзякуючы пракуратуры. Дарэчы, раней жыльцы самi былi вымушаны наводзiць чысцiню.

Жыхар Оршы паскардзiўся ў пракуратуру на тое, што камунальнiкi рэдка наводзяць парадак у пад’ездах. Згодна з санiтарнымi правiламi i нормамi, вiльготная ўборка месцаў агульнага карыстання павiнна праводзiцца не менш за 1 раз у сем дзён, сухая ўборка — кожны дзень.

А ў рашэннi Аршанскага гарвыканкама чамусьцi было вызначана, што ўборка пад’ездаў, лесвiчных пляцовак, фае дамоў ажыццяўляецца толькi 2 разы ў месяц, мыццё вокнаў — 2 разы ў год (вясной i восенню) i штодзённая ўборка кабiн лiфтаў.

Грамадзянiн, незадаволены такiм становiшчам спраў, неаднаразова скардзiўся ў Аршанскi гарвыканкам i ў адрас кiраўнiцтва камунальнiкаў. Яго просьбы засталiся без увагi. Мо нiчога i не змянiлася б, калi б не ўмяшалася пракуратура.

Як паведамiла "Звяздзе" пракурор аддзела па наглядзе за выкананнем заканадаўства i законнасцю прававых актаў пракуратуры Вiцебскай вобласцi Святлана Зайцава, пратэст пракуратуры задаволены. Правiлы добраўпарадкавання i ўтрымання тэрыторый Оршы, Баранi i Балбасава прыведзены ў парадак у адпаведнасцi з патрабаваннямi заканадаўства. Акрамя гэтага, у Аршанскi гарвыканкам было ўнесена прадстаўленне аб парушэннях, што былi дапушчаны пры разглядзе зваротаў грамадзянiна, якi ўзнiмаў гэтую праблему.

Аляксандр ПУКШАНСКI.