Паўтарэнне пройдзенага

Источник материала:

...Напрыканцы 60-х у СССР папулярныя музыканты зацiснутыя ў жорсткiя рамкi. Партыйныя крытыкi накiдваюцца лiтаральна за ўсё: прыпадабненне да Захаду, манернасць, безыдэйнасць... Да Мiнска ад гэтых хваляў даходзяць хiба толькi адгалоскi, таму ў фiлармонii з’яўляецца i спакойна развiваецца новы эстрадны ансамбль "Лявоны", якi ўзначальвае Уладзiмiр Мулявiн. Калектыў неверагодна хутка набывае папулярнасць, i менавiта гэта ў 1970 годзе падштурхоўвае фiлармонiю зрабiць рызыкоўны крок: Мулявiна i яго ансамбль адпраўляюць на Усесаюзны конкурс, адкуль у выпадку поспеху ляжыць прамая дарога на вялiкую, саюзнага ўзроўню, эстраду. Каб не выбiвацца з вобразу савецкiх эстрадных выканаўцаў, удзельнiкам ансамбля настойлiва раяць пастрыгчыся i пагалiцца — нiякiх вусоў i барод. Музыканты адмаўляюцца, неахвотна пагадзiўшыся толькi на адну ўмову — змянiць назву. Зрэшты, у Маскве высокае журы нават не звяртае ўвагi на доўгiя валасы i вусы музыкантаў, здзiўленае iх выканальнiцкiм узроўнем. "Песняры" лiтаральна прачнулiся знакамiтымi.

Ад ператварэння ў шаблоннае ВІА iх выратавала толькi адно: у Маскве калектыў палiчылi фальклорным i самабытным, а ў Мiнску не рашылiся аспрэчыць меркаванне афiцыйнай Масквы. З таго часу "Песняроў" прапаганда прадстаўляла як неад’емную частку нацыянальнай культуры. Беларускае тэлебачанне зняло пра iх музычны фiльм — першы ў СССР фiльм пра вакальна-iнструментальны ансамбль... Але за ўзлётамi ансамбль напаткала чарада непрыемнасцяў: з калектыву сышлi асноўныя выканаўцы, назапасiлiся ўнутрысямейныя праблемы. Дагэтуль не вырашана пытанне, хто з колiшнiх удзельнiкаў мае большыя правы на брэнд "Песняроў". I толькi адно захавалася нязменным: любоў i прыязнасць некалькiх пакаленняў слухачоў да "беларускага цуду"...