Бясплатная кватэра: якія варыянты?

Источник материала:

Як вядома, раней атрыманне службовага жылля найперш залежала ад спецыяльнага пералiку прафесiй i пасад. Аднак сiтуацыя змянiлася пасля 19 сакавiка мiнулага года. З гэтага часу пералiк скасаваны. Затое з’явiлiся iншыя ўмовы — былi вызначаны катэгорыi грамадзян, якiя маюць права на атрыманне службовых жылых памяшканняў. I, апроч таго, былi прадугледжаны структуры, якiя могуць такiя памяшканнi прадастаўляць.

— У прыватнасцi, адна з такiх структур — Савет Мiнiстраў, — адзначае Васiль Корсук. — Пры наяўнасцi важкiх прычын дзяржаўныя органы i iншыя дзяржарганiзацыi могуць звяртацца з хадайнiцтвам ва Урад з просьбай прадаставiць службовае жыллё тром катэгорыям грамадзян. Па-першае, маладым спецыялiстам, якiя навучалiся "на бюджэце" i пачалi працаваць па размеркаваннi. Па-другое, работнiкам арганiзацый, што знаходзяцца ў зоне радыеактыўнага забруджвання больш за 5 Кюры i прыроўненых да iх тэрыторый. I па-трэцяе, асобам у выпадку пераезду з iншага населенага пункта пры прызначэннi на пасаду або ў выпадку пераводу ад аднаго наймальнiка да другога ў сувязi з абгрунтаванай вытворчай цi эканамiчнай неабходнасцю. Праўда, калi маецца на ўвазе перавод, то тут спатрэбiцца пацвердзiць, што ў дадзеным населеным пункце знайсцi паўнавартасную замену "запрошанаму" спецыялiсту немагчыма.

Плюс да таго, яшчэ адзiн орган, праз якi прадастаўляецца службовае жыллё — гэта аблвыканкам. Хадайнiцтвы сюды падаюцца ў дачыненнi да грамадзян, якiя пражываюць у вёсцы i працуюць у сельгасарганiзацыях або ў iншых арганiзацыях, што абслугоўваюць гэтую галiну, а таксама ў дачыненнi да работнiкаў санаторыяў i рэабiлiтацыйных цэнтраў — зноў-такi, калi падобныя ўстановы размешчаныя ў сельскай мясцовасцi.

— Без улiку ўсяго сказанага вышэй службовае жыллё можа прадастаўляцца толькi суддзям, пракурорскiм работнiкам, ваеннаслужачым, супрацоўнiкам мiлiцыi, органаў фiнансавых расследаванняў, органаў i падраздзяленняў па надзвычайных сiтуацыях — за выключэннем ваеннаслужачых-тэрмiноўшчыкаў i курсантаў, — заўважае Васiль Корсук. — Пры гэтым, што да суддзяў i пракурорскiх работнiкаў, то тут заканадаўства прадугледжвае — яны павiнны атрымаць службовыя кватэры не пазней чым праз 6 месяцаў пасля прызначэння на пасаду або пастаноўкi на ўлiк для паляпшэння жылёвых умоў.

Варта заўважыць, што дагэтуль гаворка iшла аб работнiках дзяржаўных органаў цi арганiзацый. Разам з тым паспрыяць работнiкам у вырашэннi галоўнага пытання могуць i арганiзацыi iншых формаў уласнасцi. Калi такiя арганiзацыi маюць свой жылфонд, то ва ўласнiка ёсць права жыллё з гэтага фонду адчужаць, прадаваць або здаваць у адпаведнасцi з дагаворам найму.

Не менш папулярнае пытанне датычыцца варыянтаў прыватызацыi службовага жылля. Да пачатку гэтага года, паводле пiсьмовай заявы, аформiць жыллё ва ўласнасць маглi некаторыя прадугледжаныя заканадаўствам катэгорыi грамадзян — у прыватнасцi, грамадзяне, якiх выселiць са службовых памяшканняў без прадастаўлення "замены" было нельга. Да прыкладу, гэта iнвалiды I i II груп, iнвалiды i ўдзельнiкi Вялiкай Айчыннай вайны, грамадзяне, звольненыя ў сувязi з лiквiдацыяй арганiзацыi i па скарачэннi штатаў, асобы, якiя атрымалi цяжкую вытворчую траўму або прафзахворванне, цi асобы, якiя адпрацавалi ў арганiзацыi не менш за 10 гадоў. Аднак цяпер сiтуацыя змянiлася — прыватызаваць службовае жыллё ўжо немагчыма. Як, да слова, не падлягае прыватызацыi i сацыяльнае жыллё.

Аб сацыяльным жыллi — размова асобная. Фактычна прадастаўляць яго могуць як арганiзацыi, так i выканкамы. Аднак у сапраўднасцi гэта робяць толькi апошнiя.

— Увогуле пры прадастаўленнi сацыяльнага жылля нашы грамадзяне падзеленыя на дзве групы, — кажа Васiль Корсук. — Да першай з iх адносяцца пэўныя катэгорыi, якiя могуць разлiчваць на дзяржаўную кватэру з улiкам даходаў. Да такiх катэгорый адносяцца iнвалiды I i II груп; грамадзяне, якiя пражываюць у дамах-iнтэрнатах для састарэлых i iнвалiдаў, якiм пры паўторным аглядзе вызначана III група або якiя прызнаныя ва ўстаноўленым парадку дзеяздольнымi; пенсiянеры (мужчыны ва ўзросце 60 i жанчыны ва ўзросце 55 гадоў); сем’i з дзецьмi-iнвалiдамi; шматдзетныя сем’i, мацi, якiм прысвоена званне Мацi-гераiня цi якiя маюць ордэн Мацi, ордэн Мацярынскай славы або "Медаль мацярынства"; грамадзяне, якiя ўзялi на выхаванне 3 i больш дзяцей-сiрот цi дзяцей, якiя засталiся без бацькоўскай апекi; ветэраны баявых дзеянняў на тэрыторыi iншых дзяржаў i члены сем’яў ветэранаў вайны, якiя загiнулi або памерлi. Прычым вызначана: сярод гэтых катэгорый права на сацыяльную жылплошчу маюць толькi тыя, у каго на кожнага члена сямi’i атрымлiваецца даход нiжэй за сярэднi бюджэт пражытковага мiнiмуму (на сёння гэта крыху больш за 224 тыс. рублёў) за апошнiя 12 месяцаў перад пастаноўкай на ўлiк i на дзень прадастаўлення жылля, а таксама хто валодае маёмасцю, якая не перавышае кошт будучай кватэры.

Не сакрэт, што менавiта "планка даходаў" — умова часта невыканальная. Сёння ўзровень БПМ перавышае нават пераважная большасць пенсiй. Таму асноўнымi атрымальнiкамi сацыяльнага жылля становяцца iншыя — тыя, хто можа разлiчваць на яго без спасылак на ўласны ўзровень дабрабыту.

— У прыватнасцi, без улiку даходаў такое права прадугледжана для грамадзян, жылыя памяшканнi якiх сталi непрыдатнымi для карыстання ў вынiку надзвычайных сiтуацый; грамадзяне, якiя маюць вызначаныя спецыяльным пералiкам Мiнiстэрства аховы здароўя захворваннi, пры наяўнасцi якiх немагчыма сумеснае пражыванне ў адным пакоi цi ў аднапакаёвай кватэры, грамадзяне, якiя маюць дзяцей з такiмi захворваннямi; дзецi-сiроты i дзецi, якiя засталiся без бацькоўскай апекi; Героi Беларусi, СССР, Сацпрацы, поўныя кавалеры ордэнаў Славы, Працоўнай Славы; ветэраны i iнвалiды Вялiкай Айчыннай вайны, iнвалiды баявых дзеянняў на тэрыторыi iншых дзяржаў; ваеннаслужачыя, асобы радавога i кiруючага складу органаў унутраных спраў, органаў фiнансавых расследаванняў, органаў i падраздзяленняў па надзвычайных сiтуацыях, якiя сталi iнвалiдамi ў вынiку ранення, кантузii, знявечання або захворвання пры выкананнi службовых абавязкаў; iнвалiды з дзяцiнства ў вынiку ранення, кантузii, знявечання, звязаных з баявымi дзеяннямi падчас Вялiкай Айчыннай вайны або з наступствамi ваенных дзеянняў; грамадзяне, якiя перанеслi прамянёвую хваробу ў вынiку катастрофы на ЧАЭС i iнвалiды-чарнобыльцы, — адзначае Васiль Корсук. — Пры гэтым лiтаральна з 7 кастрычнiка ў гэты пералiк увайшлi таксама непрацуючыя адзiнокiя iнвалiды I i II груп, а таксама непрацуючыя адзiнокiя пенсiянеры — мужчыны, якiя дасягнулi ўзросту 60, i жанчыны, якiя дасягнулi ўзросту 55 гадоў.