Колькi можна трываць (10.10.2008)

Источник материала:

"Працуем з шасцi гадзiн вечара да шасцi гадзiн ранiцы. І ўжо месяц у аварыйным рэжыме. Адмiнiстрацыя прымушае нас выконваць працоўныя абавязкi пад напружаннем 600 В, вакол мокра, з-за павышанай вiльготнасцi зверху iскраць правады, як бенгальскiя агнi. Парушаюцца нашы правы, элементарныя нормы тэхнiкi бяспекi... "

Карэспандэнты неадкладна выехалi на месца разам з прадстаўнiкамi Мiнскага гарадскога ўпраўлення Дэпартамента дзяржаўнай iнспекцыi працы. I на ўласныя вочы пераканалiся, што скарга работнiц тралейбуснага парка не была беспадстаўнай.

Дырэктар фiлiяла тралейбуснага парка № 4 Барыс Дземiдовiч на словах паабяцаў прыняць неабходныя меры: знайсцi альтэрнатыўнае месца, дзе работнiкi маглi б прыводзiць у належны стан тралейбусы, вырашыць пытанне з бытоўкай. Прайшоў амаль месяц. На адрас рэдакцыi прыйшоў лiст ад iмя генеральнага дырэктара КУП "Мiнсктранс":

"Зараз у фiлiяле "Тралейбусны парк № 4" у адпаведнасцi з Праграмай развiцця камунальнага пасажырскага транспарту горада Мiнска на 2007—2010 гады вядуцца будаўнiча-мантажныя работы па рэканструкцыi мыйнага корпуса. Для правядзення ўборачна-мыйных работ арганiзавана работа першай лiнii мыйкi, для функцыянавання якой залiты фундамент i засыпаны катлаван, выкананы дэмантаж электраправодкi, якая не выкарыстоўвалася, i iншых камунiкацый. Для абагравання i кароткачасовага адпачынку мыйшчыц-прыбiральшчыц рухомага саставу абсталявана часовае бытавое памяшканне (вагончык) па-за зонай выканання будаўнiча-мантажных работ.

Выкананне работ на такiх складаных аб’ектах без спынення вытворчасцi непазбежна цягне за сабой праблемы з арганiзацыяй тэхналагiчнага працэсу, але пры гэтым нiякiм чынам не павiнна быць выпадкаў парушэнняў аховы працы. За непрыняцце мераў для забеспячэння ў поўным аб’ёме патрабаванняў аховы працы пры прывядзеннi ўборачна-мыйных работ шэраг службовых асобаў фiлiяла "Тралейбусны парк № 4" дэпрэмiяваны".