Цэны На большасць сельгаспрадуктаў — свабодныя

Источник материала:

Паводле апошнiх даных Мiнсельгасхарча, сёлета аб’ём экспартных паставак беларускага харчавання перавысiў 1,2 мiльярда долараў. Гэта на 36 працэнтаў больш, чым за такi ж перыяд мiнулага года. Як адзначыў мiнiстр сельскай гаспадаркi i харчавання Сямён Шапiра, узровень вытворчасцi дазваляе не толькi поўнасцю задавольваць патрэбы ў сельскагаспадарчай прадукцыi, але i пэўную частку пастаўляць за мяжу. У грамадскiм сектары АПК аб’ём сельскагаспадарчай вытворчасцi ў параўнаннi з мiнулым годам павялiчыцца на 11,5—12 працэнтаў. А вось у прысядзiбных гаспадарках адбудзецца скарачэнне: сёлета на 17 тысяч паменшала падворкаў вяскоўцаў, на 50 тысяч галоў "згарнуўся" прыватны статак.

Вытворчасць малака дасягнула 6 мiльёнаў тон, з якiх палову магчыма адпраўляць на экспарт. Але неабходна гандляваць пераважна гатовай прадукцыяй, а не сыравiнай. Дазвол на вываз у Расiю невялiкiх партый малака ў цыстэрнах атрымалi толькi 5-6 перапрацоўчых прадпрыемстваў. Астатнiя павiнны нарошчваць пастаўкi масла, сыроў, сухога i пастэрызаванага малака i г.д. Тым больш што на адпаведную прадукцыю пастаянна вялiкi попыт, якi ўзрастае з года ў год.

Як растлумачыў Сямён Шапiра, патрэба Расii ў малацэ i малакапрадуктах складае каля 37 мiльёнаў тон, унутраныя вытворцы здольныя забяспечыць 31 млн тон Астатняе iм неабходна завозiць. Беларусь становiцца заўважным удзельнiкам на расiйскiм рынку. Узровень якасцi айчыннай мяса-малочнай прадукцыi адзiн з самых высокiх не толькi на постсавецкай прасторы, але i ў Еўропе. Паводле слоў Сямёна Шапiры, для вытворчасцi выкарыстоўваецца натуральная сыравiна — да прыкладу, малочная прадукцыя вырабляецца толькi з натуральнага малака. У шэрагу краiн для гэтых патрэбаў выкарыстоўваецца сухое. Таму ў той жа Расii ўнесены змяненнi ў стандарты i ў такiм разе прадукцыя павiнна будзе называцца "малочны напой".

Прэтэнзii да беларускай прадукцыi з боку Рассельгаснагляду, на думку Сямёна Шапiры, у першую чаргу звязаны не з якасцю, а з неабходнасцю правядзення належнай тэхнiчнай мадэрнiзацыi на айчынных прадпрыемствах перапрацоўкi. Зараз набываецца ўсё неабходнае абсталяванне, каб праводзiць паўнаважкi аналiз па ўсiх пазiцыях (у прыватнасцi, адна з заўваг расiйскага боку — магчымая наяўнасць у гатовай прадукцыi рэшткаў медыцынскiх сродкаў, якiя прымянялiся для лячэння жывёл). З iншага боку, каля 13 працэнтаў нашага ўнутранага рынку малочнай прадукцыi прыпадае на расiйскiх вытворцаў, у дачыненнi да якiх беларускiмi структурамi плануецца правесцi праверкi на адпаведнасць нарматыўным патрабаванням. "Мы мяркуем прыняць адэкватныя меры да расiйскiх вытворцаў i знайшлi паразуменне ў расiйскiх калег, якiя лiчаць, што неабходна разам наводзiць парадак", — заўважыў Сямён Шапiра.

Увогуле прадукты харчавання за мяжу пастаўляюць 122 беларускiя прадпрыемствы. Як адзначаюць у Мiнсельгасхарчы, на экспарт павiнны працаваць пераважна буйныя вытворцы. Толькi такiя прадпрыемствы будуць здольныя заваяваць свой сегмент на рынку i належным чынам яго захоўваць i павялiчваць. Як паведамiў Сямён Шапiра, у блiжэйшы час мяркуецца разгледзець пытанне аб больш глыбокай iнтэграцыi рынкаў сельскагаспадарчай прадукцыi Беларусi i Расii. Таксама будзе ўдакладнена квота адпаведных паставак на рынак РФ.

У блiжэйшы час, магчыма, адбудуцца пэўныя змяненнi ў структуры дзяржаўнага кiравання аграпрамысловым комплексам. У прыватнасцi, паведамiў Сямён Шапiра, падрыхтаваны праект указа кiраўнiка дзяржавы аб стварэннi Белсельгаснагляда. Па аналогii з адпаведнай расiйскай структурай у беларускага падраздзялення павiнны быць шырокiя паўнамоцтвы i функцыi ў сферы нагляду. Канчатковае рашэнне будзе прынятае пасля ўзгаднення такой мадэрнiзацыi структуры АПК з усiмi зацiкаўленымi. Таксама плануецца мадэрнiзаваць i гаспадарчую структуру ўпраўлення. Да прыкладу, стварыць шэраг прадуктовых кампанiй, якiя былi б не толькi здольныя каардынаваць той цi iншы накiрунак, але i выходзiць ад адной асобы на знешнi рынак.

Закупачныя цэны на сельгаспрадукцыю ў суседнiх дзяржавах на парадак вышэйшыя, чым у Беларусi. Калi не адсочваць сiтуацыю, лiчыць Сямён Шапiра, можна "згубiць" значную частку сыравiны, якая так неабходная вытворцам. Таму сёлета было прынятае рашэнне аб павышэннi закупачных цэнаў. Адэкватнага павелiчэння оптава-адпускных цэнаў тады не адбылося. Іх плануецца "падцягнуць" да канца гэтага года: на малочную прадукцыю — на 2,5 працэнта, на ялавiчыну — на 5, на свiнiну — на 8. Такiм чынам, заўважыў Сямён Шапiра, удасца падтрымаць айчыннага вытворцу. Увогуле, па словах мiнiстра, на большасць сельскагаспадарчай прадукцыi — свабодныя рынкавыя цэны. У разрадзе рэгулюемых пазiцый засталiся толькi мяса-малочныя прадукты, а таксама збожжа, якое закупляецца ў лiк дзяржзаказу.