Пенсійны ўзрост... з правам на выбар?

Источник материала:

Да канца 2009 года плануецца падрыхтаваць i накiраваць на разгляд Савета Мiнiстраў пакет змяненняў у пенсiйным заканадаўстве — аб гэтым паведамiў мiнiстр працы i сацыяльнай абароны Уладзiмiр Патупчык.

Новы законапраект будзе распрацоўвацца сумесна з дэпутатамi Палаты прадстаўнiкоў. Пры гэтым, паводле слоў мiнiстра, распрацоўшчыкi маюць намер дзейнiчаць галосна, з улiкам iнтарэсаў грамадзян краiны i магчымасцi пенсiйнай сiстэмы.

У прыватнасцi, плануецца закласцi эканамiчны механiзм, якi дазволiць чалавеку рабiць самастойны выбар — выходзiць на заслужаны адпачынак раней цi пазней. Прычым у апошнiм выпадку сам памер пенсii будзе большым. Па сутнасцi, такiм чынам мяркуецца стымуляваць больш познi выхад на пенсiю — менавiта такiя падыходы выкарыстоўваюць многiя краiны свету. "Сёння дзяржава не можа сабе дазволiць выплачваць вялiкiя пенсii тым, хто яшчэ мае здароўе i магчымасцi працаваць", — заўважыў з гэтай нагоды мiнiстр.

Не сакрэт, што цяперашнiя памеры пенсiй i сацыяльных дапамог залежаць ад стану эканомiкi. Варта нагадаць: планавалася, што з 1 студзеня памер дапамог на дзяцей ва ўзросце да 3 гадоў павялiчыцца з 80 да 100 працэнтаў бюджэту пражытачнага мiнiмуму. Пакуль гэтага не адбылося. Разам з тым Уладзiмiр Патупчык заўважыў: паводле Генеральнага пагаднення памiж урадам, прафсаюзамi i аб’яднаннямi наймальнiкаў, да гэтага пытання неабходна вярнуцца сёлета i прыняць канчатковае рашэнне з улiкам рэальнай сiтуацыi.

Асобная тэма — заробкi. "Беларуская эканомiка адкрытая, больш чым 70 працэнтаў айчыннага ВУП iдзе на знешнiя рынкi, i многае будзе залежаць ад таго, як будзе развiвацца сусветны фiнансавы крызiс, — зазначыў Уладзiмiр Патупчык. — Таму сёння галоўнае для нас — не азiрацца на курсы валют, а забяспечыць рост рэальнай, з улiкам змянення цэн на тавары i паслугi, зарплаты". Да слова, паведамiў мiнiстр, сёлетнiя графiкi павелiчэння "бюджэтнай" тарыфнай стаўкi І разраду плануецца вызначыць да канца студзеня.

Тым часам, не менш пытанняў наконт рынку працы. Пэўныя змены тут ёсць, апошнiм часам маштабы вымушанай няпоўнай занятасцi павялiчылiся. "Яны не маюць крытычнага характару, у нас не зачыняюцца прадпрыемствы, на сёння ў службах занятасцi не з’яўляюцца паведамленнi аб мяркуемых звальненнях — паводле заканадаўства, такiя заяўкi павiнны рабiцца за 2-3 месяцы, — зазначыў Уладзiмiр Патупчык. — Для нас важна захаваць вытворчасцi нават з невысокiм узроўнем рэнтабельнасцi, таму сёння мы перайшлi на дэкадны манiторынг стану рынку працы i бачым суб’екты гаспадарання, дзе з’яўляюцца праблемы — гэта дазваляе прымаць хуткiя меры па паляпшэннi сiтуацыi".