Як вырашыць жыллёвае пытанне?

Источник материала:

Палажэннем аб iнтэрнатах, зацверджаным пастановай Савета Мiнiстраў Рэспублiкi Беларусь ад 15.09.1999 № 1437 са змяненнямi i дапаўненнямi на 20.08.2008 г., устаноўлена, што жылое памяшканне ў iнтэрнатах даецца грамадзянам па сумесным рашэннi адмiнiстрацыi арганiзацыi i прафсаюзнага камiтэта ў парадку чарговасцi, зыходзячы з часу прыняцця на ўлiк ахвотных атрымаць жылое памяшканне ў iнтэрнаце, на час працы ў гэтай арганiзацыi. На такi ўлiк прымаюцца грамадзяне па iх заяве з часу паступлення на працу ў адпаведнасцi з жыллёвым заканадаўствам i калектыўнымi дагаворамi, дзейнымi ў арганiзацыi. Заканадаўствам не прадугледжана права маладых спецыялiстаў на першачарговае або пазачарговае забеспячэнне памяшканнямi ў iнтэрнатах, аднак калектыўным дагаворам арганiзацыi такое права можа быць прадугледжана.

Палажэннем аб размеркаваннi выпускнiкоў, якое дзейнiчала на дзень вашага размеркавання, а таксама новым Палажэннем, зацверджаным пастановай Савета Мiнiстраў Рэспублiкi Беларусь ад 10.12.2007 г. № 1702, устаноўлена, што пры недастатковасцi ўласнага жыллёвага фонду арганiзацыi могуць выдзяляць маладым спецыялiстам, якiя прыбылi на працу па персанальным размеркаваннi, сродкi з мэтай кампенсацыi затрат на наём жылых памяшканняў у грамадзян (пункт 25).

Згодна з пунктам 7 Палажэння, зацверджанага Указам Прэзiдэнта Рэспублiкi Беларусь ад 29.11.2005 г. № 565 "Аб некаторых мерах па рэгуляваннi жыллёвых адносiнаў" са змяненнямi i дапаўненнямi, улiк грамадзян, якiя маюць патрэбу ў паляпшэннi жыллёвых умоў, ажыццяўляецца мясцовымi выканаўчымi i распарадчымi органамi па iх пастаянным месцы жыхарства. Пацвярджэннем таго, што ваша пастаяннае месца жыхарства знаходзiцца ў горадзе Мiнску, з’яўляецца рэгiстрацыя ў Мiнску па месцы жыхарства ў парадку, прадугледжаным Палажэннем аб рэгiстрацыi грамадзян па месцы жыхарства i месцы знаходжання, зацверджаным Указам Прэзiдэнта Рэспублiкi Беларусь ад 07.09.2007 г. № 413.

Пунктам 6 Палажэння, зацверджанага Указам № 565, прадугледжана, што на ўлiк асобаў з патрэбай у паляпшэннi жыллёвых умоў не прымаюцца грамадзяне, якiя прыбылi ў г. Мiнск з iншых населеных пунктаў, на працягу 5 гадоў з дня рэгiстрацыi iх па месцы жыхарства ў горадзе Мiнску. У кастрычнiку 2008 года ўступiлi ў сiлу змяненнi i дапаўненнi ў гэта Палажэнне, якiя прадугледжваюць у гэтым плане выключэнне для маладых спецыялiстаў, якiя атрымалi адукацыю за кошт рэспублiканскага i (або) мясцовых бюджэтаў i накiраваных на працу ў г. Мiнск па размеркаваннi ўстаноў, якiя забяспечваюць атрыманне сярэдняй спецыяльнай i вышэйшай адукацыi. Гэта азначае, што пакуль вы з’яўляецеся маладым спецыялiстам, вы можаце стаць на ўлiк асобаў з патрэбай у паляпшэннi жыллёвых умоў адразу пасля рэгiстрацыi ў Мiнску па месцы жыхарства.

Для гэтага вам неабходна звярнуцца ў аддзел жыллёвай палiтыкi адмiнiстрацыi таго раёна горада Мiнска, дзе вы будзеце зарэгiстраваны па месцы жыхарства, з адпаведнай заявай, якую вы можаце напiсаць непасрэдна ў час прыёму. Пры сабе неабходна мець пашпарт з рэгiстрацыяй па месцы жыхарства ў горадзе Мiнску; дакументы, якiя пацвярджаюць ваш статус маладога спецыялiста (гэта могуць быць копii дыплома, пасведчання аб накiраваннi на працу i працоўнага дагавора (кантракта)); дакументы, якiя пацвярджаюць права на пазачарговае цi першачарговае прадастаўленне жылога памяшкання (пры наяўнасцi ў вас такога права); звесткi аб даходах i маёмасцi, якiя прыходзяцца на кожнага члена сям’i, калi вы маеце права на атрыманне жылога памяшкання сацыяльнага карыстання. Астатнiя неабходныя дакументы запрошвацца мясцовым выканаўчым i распарадчым органам у трохдзённы тэрмiн з дня паступлення заявы грамадзянiна. Аднак вы маеце права самастойна сабраць iх i падаць разам з заявай. Гэта, напрыклад, такiя дакументы, як даведка аб займаемым у пэўным населеным пункце жылым памяшканнi i складзе сям’i, якая выдаецца арганiзацыяй, што ажыццяўляе эксплуатацыю жыллёвага фонду, або арганiзацыяй, якая прадаставiла жылое памяшканне; даведкi аб жылых памяшканнях, якiя знаходзяцца ва ўласнасцi грамадзянiна i членаў яго сям’i ў населеным пункце па месцы падачы заявы аб прыняццi на ўлiк, якiя выдаюцца тэрытарыяльнай арганiзацыяй па дзяржаўнай рэгiстрацыi нерухомай маёмасцi, правоў на яе i здзелак з ёй.

Таксама вы маеце права адначасова быць прынятым на жыллёвы ўлiк непасрэдна ў сваёй арганiзацыi, калi яна ажыццяўляе жыллёвае будаўнiцтва.

Пастаноўка на ўлiк па пастаянным месцы жыхарства ў горадзе Мiнску не перашкодзiць вам палепшыць свае жыллёвыя ўмовы з выкарыстаннем iльготнага крэдыту ў iншым населеным пункце. Указам Прэзiдэнта Рэспублiкi Беларусь ад 10.07.2008 г. № 382 унесены змяненнi i дапаўненнi ва Указ ад 14.04.2000 № 185 "Аб прадастаўленнi грамадзянам iльготных крэдытаў на будаўнiцтва (рэканструкцыю) або набыццё жылых памяшканняў". У адпаведнасцi з гэтымi змяненнямi грамадзяне, якiя пражываюць у гарадах абласнога падпарадкавання i ў г. Мiнску, стаяць на ўлiку асобаў з патрэбай у паляпшэннi жыллёвых умоў па iх пастаянным месцы жыхарства i хочуць палепшыць свае жыллёвыя ўмовы шляхам будаўнiцтва (рэканструкцыi) або набыцця аднакватэрных цi блакiраваных жылых дамоў у сельскiх населеных пунктах, уключаюцца па iх заявах у спiсы на атрыманне льготных крэдытаў адпаведнымi мясцовымi выканаўчымi i распарадчымi органамi па месцы пастаноўкi на ўлiк асобаў з патрэбай у паляпшэннi жыллёвых умоў.

Права на атрыманне льготных крэдытаў, субсiдый i iншых формаў дзяржаўнай падтрымкi для будаўнiцтва (рэканструкцыi) або набыцця жылога памяшкання, згодна з артыкулам 13 Жыллёвага кодэкса Рэспублiкi Беларусь, маюць малазабяспечаныя працаздольныя грамадзяне Рэспублiкi Беларусь, якiя стаяць на ўлiку асобаў з патрэбай у паляпшэннi жыллёвых умоў, а таксама грамадзяне, на якiх распаўсюджваецца дзеянне артыкула 84 гэтага кодэкса (грамадзяне, жылыя памяшканнi якiх сталi непрыдатнымi для пражывання ў вынiку стыхiйнага бедства, тэхнагенных i сацыяльных катастроф; дзецi-сiроты i дзецi, якiя засталiся без нагляду бацькоў; хворыя на актыўную форму туберкулёзу i iнш.).

Да катэгорыi малазабяспечаных працаздольных грамадзян, згодна з Палажэннем, якое зацверджана пастановай Савета Мiнiстраў Рэспублiкi Беларусь ад 20.12.2000 г. № 1955 (са змяненнямi i дапаўненнямi), адносяцца здольныя да працы грамадзяне, якiя стаяць на ўлiку асобаў з патрэбай у паляпшэннi жыллёвых умоў, у якiх сярэднямесячны сукупны даход на кожнага члена сям’i не перавышае трохразовага сярэднямесячнага сярэднедушавога мiнiмальнага спажывецкага бюджэту сям’i з 4 чалавек, вылiчанага за 12 месяцаў, якiя папярэднiчаюць месяцу падачы дакументаў для ўключэння ў спiсы на атрыманне льготнага крэдыту i (або) падачы дакументаў на атрыманне субсiдыi, i якiя валодаюць заяўленай маёмасцю, агульны кошт якой не перавышае:

для атрымання льготнага крэдыту — двухразовага найбольшага памеру льготнага крэдыту для гэтай сям’i;

для атрымання субсiдыi — кошту кватэры тыпавых спажывецкiх якасцяў зыходзячы з максiмальнай нормы прадастаўлення агульнай плошчы жылога памяшкання сацыяльнага карыстання для гэтай сям’i.

Для прыкладу: сярэднедушавы мiнiмальны спажывецкi бюджэт у сярэднiх цэнах верасня 2008 года ў разлiку на месяц на перыяд з 01.11.08 па 31.12.08 для сям’i з 4 чалавек складаў 346 190 рублёў (пастанова Мiнiстэрства працы i сацыяльнай абароны ад 15.10.2008 № 143).

Аднак нават калi вы маеце права на льготны крэдыт i (або) субсiдыю, усё роўна яны даюцца з захаваннем чарговасцi грамадзян з гэтай патрэбай па папярэдне складзеных i зацверджаных выканаўчымi i распарадчымi органамi спiсах.

Больш падрабязна ўмовы будаўнiцтва жылля, у тым лiку з прыцягненнем iльготнага крэдыту, вам неабходна высвятляць у аддзеле жыллёвай палiтыкi адмiнiстрацыi раёна па месцы пастаноўкi на ўлiк асобаў з патрэбай у паляпшэннi жыллёвых умоў. Канчаткова вырашаць пытанне, дзе лепш стаць на жыллёвую чаргу, вам трэба самастойна або параiўшыся з бацькамi.

Згодна з Палажэннем аб парадку адабрання i прадастаўлення зямельных участкаў, зацверджаным Указам Прэзiдэнта Рэспублiкi Беларусь ад 27.12.2007 г. № 667, зямельныя ўчасткi прадастаўляюцца ў арэнду або ў прыватную ўласнасць грамадзян па вынiках аўкцыёнаў арэнды i аўкцыёнаў продажу, за выключэннем выпадкаў, прадугледжаных пунктам 6 Указа. Кошт зямельных участкаў, што перадаюцца ва ўласнасць па вынiках аўкцыёну, вызначаецца аўкцыёнам i не можа быць нiжэйшым за iх кадастравы кошт.

Пунктам 6 Указа вызначана, што без правядзення аўкцыёну зямельныя ўчасткi могуць перадавацца ва ўласнасць грамадзянам Рэспублiкi Беларусь, якiя стаяць на ўлiку асобаў з патрэбай у паляпшэннi жыллёвых умоў, пастаянна пражываюць у населеных пунктах i працуюць у гэтых населеных пунктах або на тэрыторыi раёнаў, у якiх знаходзяцца такiя населеныя пункты, для будаўнiцтва i абслугоўвання аднакватэрных, блакiраваных жылых дамоў у гэтых населеных пунктах (не распаўсюджваецца на грамадзян, якiя стаяць на ўлiку, пастаянна пражываюць i працуюць у гг. Брэсце, Вiцебску, Гомелi, Гродне, Мiнску, Магiлёве). У гэтым выпадку кошт зямельных участкаў, што перадаюцца, вызначаецца па iх кадастравым кошце.

Калi ў вас атрымаецца, як вы пiшаце, дамовiцца аб пераводзе ў арганiзацыю, якая знаходзiцца ў Мiнскiм раёне, для далейшай работы па атрыманай спецыяльнасцi да заканчэння тэрмiну адпрацоўкi па размеркаваннi, вам неабходна будзе звярнуцца ў сваю ўстанову адукацыi па пераразмеркаванне (пункт 22 Палажэння аб размеркаваннi выпускнiкоў). Пасля прыняцця рашэння аб пераразмеркаваннi выпускнiку выдаецца новае пасведчанне аб накiраваннi на працу. Пры немагчымасцi прадастаўлення месца ў адпаведнасцi з атрыманай спецыяльнасцю (прафесiяй) i прысвоенай квалiфiкацыяй малады спецыялiст пры наяўнасцi падстаў для вызвалення ад кампенсацыi сродкаў дзяржаўнага i (або) мясцовага бюджэту, затрачаных дзяржавай на яго падрыхтоўку, можа звярнуцца ва ўстанову адукацыi па атрыманне даведкi аб самастойным працаўладкаваннi. Малады спецыялiст, якi атрымаў даведку аб самастойным працаўладкаваннi, страчвае статус маладога спецыялiста.