Фермеры прасiлi ўпарадкаваць падаткi i абяцалi забяспечыць рэгiён агароднiнай

У Брэсцкiм абласным аграпрамысловым саюзе сабралiся старшынi раённых саветаў кiраўнiкоў фермерскiх гаспадарак i раiлiся, як жыць далей. У фермераў назбiралася шмат пытанняў да свайго саюза, да абласной улады, а заадно i прапаноў. Сельскiя гаспадары выказалi меркаванне, што яны маглi б забяспечыць патрэбы вобласцi ў агароднiне. І iм зрабiць гэта зручней на сваiх невялiкiх плошчах, чым СВК i ААТ. Сельгаспрадпрыемствы часта займаюцца гэтай работай, так бы мовiць, ва ўрон асноўным культурам, распыляючы сiлы i сродкi. А фермер здолеў бы вырошчваць моркву, цыбулю, буракi добрай якасцi i з прыбыткам для сябе. Гэта прапанова прагучала ад фермераў. А iм у сваю чаргу прапанавалi звярнуць большую ўвагу на развiццё агратурызму ў сваiх раёнах. Як вядома, крэдыт пад 5 працэнтаў гадавых на 5 гадоў i поўнае вызваленне ад аплаты падаткаў могуць атрымаць толькi прыватныя асобы i фермеры, якiя стануць гаспадарамi турыстычных сядзiбаў. Тым болей, што справа правераная, у вобласцi ёсць домiкi, за адпачынак у якiх аматары цiшынi i прыроды гатовыя плацiць ад 15 тысяч рублёў да 50 еўра ў суткi.

Але перш чым займацца турызмам цi, напрыклад, народнымi рамёствамi, кожны фермер iмкнецца развiць асноўную вытворчасць. I на гэтым шляху па-ранейшаму паўстае шмат пытанняў.

Як паведамiў карэспандэнту "Звязды" выканаўчы дырэктар абласнога аграпрамысловага саюза Мiкалай Казак, найбольшую дыскусiю падчас нарады выклiкала абмеркаванне падаткаабкладання фермерскiх гаспадарак. На першы погляд падаткi невялiкiя — 2 працэнты адзiнага сельгаспадатку i 10 працэнтаў ПДВ. Ды ёсць закавыка: калi гаспадар здымае з рахунка грошы, з яго вылiчваюць яшчэ 15 працэнтаў. Калi б грошы iшлi на развiццё вытворчасцi, то 15-працэнтны збор не браўся б. Але для вытворчасцi неабходныя таксама стол, камп’ютар, папера. А даказаць банку, што ты будзеш на гэтым весцi бухгалтарскi ўлiк, а не пiсаць любоўныя лiсты, не ўяўляецца магчымым. Таму фермеры i падрыхтавалi зварот у падатковыя органы з прапановай змянiць сiстэму падаткаабкладання. Яны гатовыя, напрыклад, плацiць тры працэнты замест двух адзiнага падатку i пры гэтым адмянiць 15-працэнтны збор, альбо пры здыманнi грошай з рахунка вызначыць неабходны мiнiмум.

Святлана ЯСКЕВIЧ.