Ахiлесава пята лёгкай галiны

Источник материала:

На думку начальнiка галоўнага ўпраўлення кантролю над працай сферы матэрыяльнай вытворчасцi КДК Вiталя Дзераха, "ахiлесава пята" галiны на сённяшнi дзень у тым, што ў канцэрне не надаюць асаблiвай увагi пытанням выкарыстання дзяржаўнай падтрымкi. Зараз загрузка вытворчых магутнасцяў складае ўсяго ад 40 да 60%, а абнаўленне асноўных фондаў патрабуе тэрмiновага ўлiвання туды сродкаў: iх знос складае да 80%. "Усё гэта, — лiчыць Вiталь Дзерах, — прыводзiць да таго, што прадпрыемствы галiны пачынаюць працаваць на склад, працуюць са стратамi, некаторыя з iх блiзкiя да банкруцтва".

Сярод выяўленых падчас праверкi ў галiне "хiбаў" — так званая карэкцiроўка некаторымi арганiзацыямi паказчыкаў сацыяльна-эканамiчнага развiцця ў бок знiжэння: рабiлася гэта, каб выканаць умовы па аказаннi iм дзяржаўнай падтрымкi. Так, да прыкладу, для ААТ "Слонiмская камвольная прадзiльная фабрыка" напачатку 2007 года быў даведзены паказчык па рэнтабельнасцi рэалiзаванай прадукцыi ў памеры 3%, а да канца года ён быў скарэктаваны да 0,1%. Падобная практыка "дасягнення" даведзеных паказчыкаў у канцэрне летась i наогул набыла масавы характар. У 2008 годзе з 31 праверанай арганiзацыi выкананне паказчыкаў забяспечана 14 прадпрыемствамi, з iх толькi 5 выканалi заданне без карэкцiровак, а 9 — "забяспечылi" паказчыкi толькi вышэйзгаданым чынам. У прыватнасцi, ААТ "Камволь" на мiнулы год было даведзена заданне па тэмпе росту аб’ёмаў вытворчасцi 111%, удакладненае заданне склала 80%, а фактычна дасягнуты паказчык — 80,2%. Усяго ў снежнi 2008 года канцэрнам "Беллегпрам" былi скарэктаваныя ў бок знiжэння заданнi 24 арганiзацыям галiны, якiя атрымлiвалi дзяржпадтрымку.

Мiж тым, звяртаючыся да прысутных, Зянон Ломаць заўважыў, што праведзены кантралёрамi аналiз — не жаданне "ўчынiць разнос кiраўнiцтву канцэрна". Старшыня камiтэта падкрэслiў, што ў гэтай сiтуацыi задача — не толькi выявiць недахопы, але i знайсцi адказ — як лепш далей працаваць. Сёння ўжо вiдавочна, што айчынная лёгкая прамысловасць страчвае свае пазiцыi на рынку. Дарэчы, паводле агучанай iнфармацыi, на палiцах некаторых нашых крамаў сёння знаходзiцца да 80% абутку кiтайскай вытворчасцi, а замежная тканiна прадаецца часам пад маркай беларускай. І гэта ў той час, калi на складах прадпрыемстваў канцэрна прадукцыi застаецца зашмат. У сувязi з гэтым Зянон Ломаць даў даручэнне праверыць крамы ў сталiцы i абласных цэнтрах з мэтай высветлiць, якiя там выстаўлены тавары беларускай лёгкай прамысловасцi, якая iх доля побач з iмпартнымi вырабамi.

На пасяджэннi iшла гаворка i аб сур’ёзных недахопах, што былi выяўлены пры праверцы дзейнасцi Беларускай нацыянальнай перастраховачнай арганiзацыi (БНПА). Створаная два гады таму, яна фактычна не выконвае адну з асноўных задач сваёй дзейнасцi — прадпрыемства недастаткова актыўна працуе па прыцягненнi сродкаў з-за мяжы. Паводле звестак начальнiка галоўнага ўпраўлення кантролю за банкаўскай i знешнеэканамiчнай дзейнасцю КДК Вадзiма Пешкура, прадпрыемствам за два гады за мяжу перададзена перастраховачнай прэмii на суму 9 мiльярдаў рублёў, а ў рэспублiку прыцягнута ўсяго паўмiльярда.

У БНПА практыкуюцца працяглыя службовыя камандзiроўкi за мяжу без вытворчай неабходнасцi. Высветлiлася, што гендырэктар прадпрыемства за два гады 83 днi знаходзiўся ў замежных службовых камандзiроўках, выязджалi неаднаразова за межы нашай краiны i iншыя спецыялiсты, якiя па сваiх абавязках не прымаюць непасрэднага ўдзелу ў перастраховачнай дзейнасцi. Аднак вынiкi гэтых "ваяжаў", адзначыў Вадзiм Пешкур, не ўражваюць, таму што работа на сусветных рынках ажыццяўляецца толькi з дзвюма страхавымi кампанiямi.

У жнiўнi 2007 года гендырэктар, якi знаходзiўся ў адпачынку, разам з сям’ёй на службовым аўто быў дастаўлены ў аэрапорт "Барыспаль", што ў Кiеве. А праз два тыднi двое супрацоўнiкаў прадпрыемства зноў на службовым аўтамабiлi былi адпраўлены ў камандзiроўку ў Кiеў, дзе сустрэлi кiраўнiка з сям’ёй, якiя вярталiся з Турцыi, i прывезлi ў Мiнск. На калегii вялася гутарка i пра шмат iншых праблем, выяўленых у дзейнасцi перастраховачнай арганiзацыi. Па вынiках праверкi калегiяй КДК унесена прапанова па ўдасканаленнi заканадаўства ў галiне перастрахавання.