Спадзяюся дажыць

Источник материала:

Два разы прачытала артыкул "Спадарыня... Дазвольце ёй застацца!". Дзякую, шчыра дзякую за вялiкую працу, за пераканаўчасць доказаў.

А тэма ўзнятая — вельмi балючая: уявiць нават цяжка, што ёсць беларусы, якiя жадаюць, каб знiкла iхняя мова. А як жа тады нашчадкi — без твораў Янкi Купалы, Якуба Коласа, Уладзiмiра Караткевiча, Рыгора Барадулiна i многiх, многiх iншых? Пазнаёмяцца ў перакладзе? А што тады будзе з песнямi?

У савецкiя часы мне даводзiлася лячыцца ў Кiславодску. Ведаю, што з’язджаўся туды люд з усяго Саюза... І з гонарам скажу: самымi папулярнымi, самымi любiмымi ў яго былi нашы, беларускiя песнi. З задавальненнем слухалi i пра няпоўную рэчаньку, i пра "нахiлёную вярбу", i пра Алёну, што мыла пад ёй ручнiкi, i пра Яся, што касiў канюшыну, i пра "лягу-прылягу ля гасцiнца старога"... Прычым пераклад iх нiкому не быў патрэбны: нiхто нi разу не сказаў, што нечага не разумее. Наадварот — многiя цудоўна ведалi не толькi мелодыi гэтых песень, але i словы. Прынамсi, ад’язджаючы, усе i заўсёды казалi наша, бессмяротнае, крылатае: "Бывайце здаровы, жывiце багата..."

Адкуль не новая ўжо выснова — мова наша прыгожая i мiлагучная, яна мае багаты слоўны запас, якi складваўся вякамi i нягледзячы нi на што! У гiстарычным мiнулым знешнiя сiлы навязвалi беларусам то польскую мову, то рускую, ды ў iх не выйшла... Тады.

У цяперашнi час становiшча куды больш складанае, таму што засiлле рускай iдзе не звонку, iдзе знутры. На ёй размаўляюць усе, цi амаль усе нашы кiраўнiкi, на ёй працуе пераважная большасць СМI, дзяржаўныя i iншыя ўстановы. У сем’ях, у садках дзецi чуюць рускую мову i засвойваюць яе з маленства.

Шкада, што многiя кiраўнiкi не хочуць бачыць, у якiм цяжкiм крызiсе знаходзiцца мова карэннай нацыi. I гэта пры тым, што яна, беларуская, здольна годна прадстаўляць краiну на любым узроўнi.

Тады чаму серыял "Экспедыцыя", у якiм будуць паказаны ўсе 118 раёнаў Беларусi, робiцца на другой дзяржаўнай? Няўжо ў нас няма беларускамоўных артыстаў? А гэтыя 7 рускамоўных тэлевыпускаў пра Беларусь для Амерыкi? Няўжо мы не здольныя расказаць пра сябе на сваёй жа мове?

...Я нiчога не маю супраць рускай — я ведаю яе, на польскай здавала кандыдацкi мiнiмум, чытаю на ўкраiнскай. Усе гэтыя мовы прыгожыя, добрыя, годна гучаць з вуснаў сваiх народаў. Чаму ж тады мы горшыя, чаму дазваляем зацiраць нашу?..

Прабачце, дужа набалела.

Хоць i далёка не 20, але я спадзяюся дажыць да тых часоў, калi Беларусь загаворыць па-беларуску.