Слова — за запрошанымi

Источник материала:

З 2007 года пачаўся дастаткова iнтэнсiўны палiтычны дыялог памiж Беларуссю i Польшчай, — адзначае пасол Польшчы ў Беларусі Генрык Лiтвiн. За гэты час праведзены шэраг сустрэч на ўзроўнi мiнiстраў замежных спраў, намеснiкаў прэм'ер-мiнiстраў. "Дыялог развiваецца, ён вядзе да сустрэч на яшчэ больш высокiм узроўнi", — падкрэслiў кiраўнiк дыпламатычнага прадстаўнiцтва Польшчы ў Беларусi. I падрыхтоўка сустрэчы на найвышэйшым узроўнi, паводле слоў пасла, вядзецца, хоць сёння пакуль i рана гаварыць пра тое, калi яна можа адбыцца. Больш акрэсленай выглядае перспектыва сустрэчы кiраўнiкоў урада. "Цяпер можам гаварыць пра сустрэчу прэм'ер-мiнiстраў, без сумнення", — запэўнiў дыпламат. Ён падкрэслiў, што яе трэба падрыхтаваць, i чакаецца, што гэта адбудзецца досыць хутка.

Усходняе партнёрства Генрык Лiтвiн назваў самай важнай iнiцыятывай апошнiх гадоў, а нашу краiну — ключавым партнёрам Польшчы на Усходзе. У рэалiзацыi праграмы многае залежыць ад актыўнасцi партнёраў, падкрэслiвае кiраўнiк дыпмiсii. Польскi бок перш за ўсё разлiчвае на iнiцыятыву беларускага боку (i пра гэта Польшча гаворыць не як наша суседка, а як удзельнiца ЕС, такая пазiцыя Еўрасаюза распаўсюджваецца не толькi на Беларусь — на ўсiх удзельнiкаў Усходняга партнёрства, нагадаем, што апроч нашай краiны ў праграму запрошаныя Азербайджан, Арменiя, Грузiя, Малдова i Украiна) у рэалiзацыi канкрэтных сур'ёзных праектаў. Маецца на ўвазе не толькi эканамiчнае супрацоўнiцтва, але i гуманiтарная сфера. Ёсць ужо канкрэтныя эскiзы такiх праектаў, i яны разглядаюцца.

Беларуска-польскiя кантакты ў сацыяльна-культурнай сферы — даўнiя i плённыя. Добра паказала сябе "Нясвiжская акадэмiя" — iнiцыятыва, у рамках якой беларускiя, украiнскiя, расiйскiя спецыялiсты ў галiне культурнай спадчыны павышаюць узровень сваёй падрыхтоўкi пры ўдзеле спецыялiстаў з iншых краiн, у асноўным з Польшчы. Польшча, як i Беларусь, прайшла цяжкiя перыяды ў сваёй гiсторыi, многае з культурнай спадчыны было знiшчана. Падыход польскiх спецыялiстаў у гэтай справе можа выкарыстоўвацца ў Беларусi, мяркуе кiраўнiк дыпламатычнай мiсii. Ёсць таксама iдэя стварыць вiртуальную Нясвiжскую бiблiятэку. Аднак намаганнямi выключна беларусаў i палякаў тут не абысцiся — бiблiятэка падзеленая, яе часткi вывезеныя ў розныя краiны Еўропы. "Патрэбна шмат партнёраў, каб яе аднавiць нават у электронным выглядзе", — заўважае Генрык Лiтвiн.

Налета Польшча абвяшчае год Фрэдэрыка Шапэна, i адзначыць яго збiраецца з сусветным размахам. Ён будзе асаблiва багатым на падзеi ў Беларусi, дзелiцца планамi пасол. Дыпламат выказаў спадзяванне, што некаторым школам у Беларусi будзе прысвоена iмя вялiкага кампазiтара.

У гандлёвым абмене дзвюх краiн крызiс, безумоўна, згуляў сваю партыю. Беларускi экспарт у Польшчу скарацiўся на 40 працэнтаў, а iмпарт — на 13 — 15 працэнтаў. На думку дыпламата, падзенне не звязана непасрэдна са знiжэннем актыўнасцi эканамiчных суб'ектаў, якiя ўдзельнiчаюць у абмене. Больш за тое, актыўнасць суб'ектаў расце, аднак ва ўмовах крызiсу цяжка атрымаць той жа эфект, што i раней. Асноўнымi пазiцыямi ў iмпарце ў Польшчу з Беларусi стабiльна застаюцца нафтапрадукты i калiйныя ўгнаеннi.

Эканамiчнае ўзаемадзеянне дзвюх краiн не абмяжоўваецца выключна абменам тавараў. Рыхтуецца буйны праект будаўнiцтва цеплаэлектрастанцыi ў Зэльве, якая будзе працаваць на польскiм вугалi. Абмяркоўваюцца i праекты па пастаўках беларускiх нафтапрадуктаў у Польшчу. Генрык Лiтвiн абазначыў таксама сферу iнтарэсаў буйных польскiх iнвестараў — банкаўская сфера, страхаванне, тэлекамунiкацыi. Нашай заходняй суседцы хацелася б бачыць беларускiя суб'екты гаспадарання на Варшаўскай бiржы. Дыпламат упэўнены, што гэта ўяўляе iнтарэс i для беларускай прыватызацыi, i для польскай бiржы. Маўляў, "iншыя суседзi гэта таксама рабiлi, асцярожна, але ж рабiлi".

Сёлетнi турыстычны сезон дэманструе павышаную цiкавасць беларусаў да адпачынку ў суседняй Польшчы. Штодзень больш за тысячу беларускiх пашпартоў папаўняецца шэнгенскiмi вiзамi, аформленымi польскiмi консульствамi ў Мiнску, Гродне i Брэсце. На думку пасла, гэта сведчыць пра тое, што грамадства ўжо больш-менш прызвычаiлася да шэнгенскага рэжыму i выкарыстоўвае магчымасцi, якiя дае шэнгенская сiстэма. Рух праз беларуска-польскую мяжу яшчэ не дасягнуў узроўню 2006 — 2007 гадоў, адзначае дыпламат, аднак турыстычных паездак у Польшчу сёлета вельмi шмат. Як гэта звычайна i бывае ў суседзяў.