Падпаляўнiчага затрымалi ў заказнiку

Источник материала:

Жыхар Мiнска наладзiў незаконнае падводнае паляванне на самым глыбокiм возеры Беларусi — Доўгiм.

Доўгае, што ў Глыбоцкiм раёне, з'яўляецца гiдралагiчным заказнiкам рэспублiканскага значэння i там, натуральна, забароненыя iнтэнсiўныя спосабы лоўлi рыбы, да якiх адносiцца i падпаляванне. Браканьер з дапамогай гiдракасцюма i стрэльбы для падводнага палявання паспеў падстрэлiць усяго толькi аднаго шчупака ды i тое недамерка, калi яго спынiлi работнiкi Глыбоцкай мiжраённай iнспекцыi аховы жывёльнага i раслiннага свету. Па рашэннi суда недысцыплiнаваны падпаляўнiчы можа пазбавiцца гiдракасцюма i ўсёй экiпiроўкi.

Як паведамiў "Звяздзе" начальнiк Глыбоцкай мiжрайiнспекцыi Аляксей ПРОТАС, лiтаральна днямi давялося затрымлiваць i браканьераў з агнястрэльнай зброяй. Падчас прыродаахоўнага рэйду сумесна з супрацоўнiкамi Глыбоцкага аддзялення Беларускага таварыства паляўнiчых i рыбаловаў ў паляўнiчых угоддзях Полацкай леса-паляўнiчай гаспадаркi былi затрыманы два жыхары Полацка. Парушальнiкi ажыццяўлялi паляванне без дазваляльных дакументаў як на права палявання, так i на права нашэння i захоўвання зброi. Канфiскаваны дзве паляўнiчыя стрэльбы. Браканьераў чакае суд.

У краму в. Тартакi, якая знаходзiцца за 25 км ад Баранавiчаў, зайшоў невядомы i, выкарыстаўшы момант, калi там не было пакупнiкоў, некалькi разоў ударыў цяжкiм прадметам прадаўшчыцу па галаве.

Неўзабаве ў краму зазiрнулi наведвальнiкi i ўбачылi, што прадаўшчыца сядзiць на падлозе i крычыць. Яны выклiкалi мiлiцыю. У вынiку аператыўных дзеянняў удалася затрымаць у Слонiме жыхара Гродна. Пры iм была сякера, якую затрыманы ўкраў у леснiкоў. Сякерай ён i бiў прадаўшчыцу. А ў краме ён украў батон каўбасы, бутэльку вады, хлеб ды 200 тыс. рублёў. Прадаўшчыца ў цяжкiм стане знаходзiцца ў бальнiцы, а следчыя працуюць з затрыманым.

У Воранаўскiм раёне беларускiм i лiтоўскiм памежнiкам сумеснымi намаганнямi ўдалося прадухiлiць унiкальную спробу пераправiць кантрабандны тавар з Беларусi ў Лiтву. Двое сутак група правяла ў засадзе, але парушальнiкi не аб'явiлiся. Аднак выпадкова была знойдзена нацягнутая капронавая лёска. Пацягнуўшы за яе, памежнiкi выцягнулi вяроўку, тая ў сваю чаргу прывяла да схаваных у яме пад галiнкамi i лiсцем сумак. У iх памежнiкi знайшлi 1 тыс. пачкаў цыгарэт з акцызнымi маркамi РФ. Кантрабандысты, знаходзячыся па абодва бакi мяжы, збiралiся волакам перацягнуць тавар з Беларусi ў Лiтву, пры гэтым самi б фiзiчна мяжу не парушылi. Паводле слоў Алега Анацкага, памежнiкам упершыню давялося сутыкнуцца з такiм дасканалым спосабам кантрабанды.