Анатолю Сысу — 50

Паэтка Вольга Куртаніч вучылася з Анатолем Сысом у Гомельскім дзяржаўным унівэрсытэце. Яна згадвае, як моцна вылучаўся малады паэт сярод астатніх студэнтаў, што пачыналі сябе сьцьвярджаць у літаратуры.

“Нам, студэнтам 80-х Гомельскага ўнівэрсытэту пашчасьціла. Пашчасьціла, што сярод нашых паэтаў і празаікаў вылучаўся Анатоль Сыс, чалавек, за якім хацелася цягнуцца і з кім хацелася параўноўваць сваю творчасьць. Памятаю, калі мы ўсе ўжо выйшлі з унівэрсытэту дыплямаванымі і Анатоль прыехаў на працу ў Менск, тут адбывалася тое ж самае. Народ творчы адразу абраў яго за куміра. У яго была вялікая харызма, моцны характар, магутны творчы хрыбет і выдатны творчы трамплін. Хацелася б верыць, што памяць пра Анатоля захаваюць ня толькі тыя, хто яго ведаў, але і тыя, хто толькі-толькі знаёміцца з творчасьцю Сыса”.

Кніга выбраных вершаў Анатоля Сыса “Алаіза”, якая выходзіць да юбілейнай даты, якраз адрасаваная тым, хто ў свой час разьмінуўся зь яго прыжыцьцёвымі зборнікамі “Агмень”, “Пан Лес” і “Сыс”. “Алаіза” выходзіць, дзякуючы рупнасьці літаратуразнаўцы, праваабаронцы і сябра паэта з 1979 году Алеся Бяляцкага.