На Гомельшчыне пачалі адразу дзве крымінальныя справы аб педафіліі

На працягу сутак у Гомельскай вобласці пачалі дзве крымінальныя справы аб педафіліі, паведамляе прэс-служба Следчага камітэта.

Па адной з іх пацярпелай прызналі 12-гадовую дзяўчынку. Гэтую справу расследуе Гомельскі раённы аддзел Следчага камітэта. Абвінавачаным па справе праходзіць яе 37-гадовы дзядзька. Супрацьпраўныя дзеянні адбываліся ў вёсцы, куды дзяўчынка прыязджала пагасціць да бабулі.

Мазырскі раённы аддзел Следчага камітэта пачаў справу супраць 44-гадовага непрацуючага жыхара Лельчыцкага раёна. У сярэдзіне лютага мужчына, які злоўжывае спіртнымі напоямі, прыехаў у Мазыр. Там ён вёў бадзяжны лад жыцця, начаваў у сутарэннях і пад'ездах шматпавярховых дамоў. 20 Лютага а 20-й гадзіне, як сцвярджае следства, мужчына ў нецвярозым стане на тэхнічным паверсе дома "здзейсніў распусныя дзеянні" ў дачыненні да 12-гадовага хлопчыка.

Абодва зламыснікі ўзятыя пад варту. З іх удзелам праводзяцца следчыя дзеянні.