Магічная мапа Гомеля ад Леслі Найфа

Источник материала:

Лідар металёвага Gods Tower легендарны Леслі Найф назваў тры самыя гатычныя, загадкавыя ды вусцішныя месцы роднага Гомеля.

Спуск па вуліцы Падгорнай

За царскім часам гэты раён называўся Каўказ. Каўказ мае багатую гісторыю: калісьці тут былі публічныя дамы, а падчас Другой сусветнай вайны стаялі шыбеніцы, на якіх вешалі непажаданых.

Старая Валатова

Вёска ў межах горада, у пачатку 90-х многія бачылі над ёй НЛА, можна тут сустрэць і прывідаў. Я сам назіраў дзіўныя з’явы. Тут ёсць месца, дзе знаходзіцца паварот ракі і невялічкая выспа, на якую мы хадзілі адпачываць. Пераходзячы ноччу рэчку ўброд, на дрэвах я пабачыў Вілію. Гэта такая прывідная жанчына, якая спераду ёсць, а калі глядзець ззаду, яна знікае. Можна сказаць, што я зашмат ужыў алкаголю, але дыму без агню не бывае. Да таго ж у гэтым месцы зданяў бачылі многія.

Могілкі ў Навабеліцы

На Навабеліцкіх могілках ёсць адзін склеп. Мясцовая легенда кажа, што пасля вайны ў ім былі знойдзеныя нямецкія дакументы. Аднойчы супрацоўнікі спецслужбаў пайшлі ў той склеп нешта шукаць ды і самі зніклі, і сувязь з імі перарвалася. Пасля гэтага выпадку склеп зачынілі, і цяпер туды нікога не пускаюць.

Сутнасць праекта “Магічная мапа” кампаніі “Будзьма беларусамі!”: з існых адасобленых “пазлаў” — мясцінаў беларускіх гарадоў — стварыць агульную, актуальную калектыўную гарадскую гісторыю Беларусі. Горад — прастора супольная. І магічная мапа павінная стварацца супольна. Таму прапаноўваем стаць удзельнікам праекта ўсім, хто хоча падзяліцца сваімі таямнічымі ведамі. Мы чакаем і вашых допісаў! Дасылайце на адрас кампаніі razam@budzma.by (з пазнакай у тэме ліста “Магічная мапа”) спіс сваіх магічных месцаў (не больш за тры), тых месцаў, якія маюць сваю гісторыю і патэнцыйна будуць цікавыя іншым жыхарам горада. Дасылайце пералік разам з кароткім тлумачэннем: чаму гэтае месца для вас дарагое альбо чаму вы лічыце яго магічным, адметным. Найцікавейшыя аповеды будуць публікавацца на нашай старонцы “Магічная Мапа” і аздабляцца малюнкамі Андруся Такіндага. Калі вы малюеце самі, дасылайце і свае малюнкі! ♦ Чытаць пра праект “Магічная мапа” ад кампаніі “Будзьма беларусамі!”