Чего хотят женщины?

Святлана Карпушэнка: Канешне ж, жанчына хоча жаночага шчасця! Зразумела, што для кожнай жанчыны гэта нешта сваё. Мара даць новае жыццё ў мяне ажыццявілася. Адчуванне малюсенькай асобы ў цябе на грудзях – гэта такое шчасце, якое цяжка апісаць словамі. Шчасце – гэта калі родныя і вельмі блізкія табе людзі здаровыя. Усё астатняе можна адрамантаваць, выкінуць, купіць і наогул забыць. І наогул, кожная жанчына – каваль свайго шчасця.

Анастасія Барышава: Увагі! Нам вельмі важна, каб вы, мужчыны, удзялялі нам сваю ўвагу. Не, я не пра дарагія падарункі, паходы ў рэстаран, я пра званкі, просьбы апрануцца пацяплей у халоднае надвор’е, паднесці сумку, сказаць камплімент, сарваць і падарыць рамонак з поля. Для вас, можа, гэта дробязі, але, паверце, ніводную даму яны не пакінуць раўнадушнай.

Наталля Пятрова: Я пераканана, што любая жанчына хоча букет кветак і сертыфікат у касметычны салон.

Наталля Голуб: Жанчына хоча свабоды, падарожжаў і каб як мага пазней ў яе сталі выдатна атрымлівацца бліны. А то ў нас так атрымліваецца: чым старэй жанчына, тым лепш яна пячэ бліны…

Валянціна Штуро: Вельмі цяжка сказаць, чаго хоча жанчына. Яна часта не ведае, чаго хоча.  Напэўна, кветак, падарункаў, віншаванняў на 8 Сакавіка. Павагі, каб яе абажалі і абагаўлялі не толькі ў свята, а і кожны дзень. І самае галоўнае, каб ўсе яе родныя і блізкія людзі былі здаровыя, каб у сям’і быў лад, спакой і ўзаемаразуменне. Толькі тады яна будзе шчаслівай.

Пётр ГАНУШЧАНКА: Лічу, што кожная жанчына хоча здароўя. Калі жанчына здаровая, то  ў яе ўсё выдатна як дома, так і на рабоце, яна, як гаворыцца, гатова горы звярнуць. Ды і ў нас, мужчын, усё атрымліваецца, калі  каханая жанчына здаровая і  ў цудоўным настроі.

Валерый ЖАНДАРАЎ: Гледзячы якая жанчына. Вось у нашай сям’і ўсё па-вайсковаму, недарэмна ж жонка – прапаршчык у адстаўцы, дачка – афіцэр, падпалкоўнік, унучка – васьмікласніца, якая марыць стаць ваеннай. Вось і атрымліваецца, што жанчыны нашай сям’і хочуць павагі да арміі і ваенных, кар’ернага росту і, як любая жанчына ў свеце, пяшчоты і сямейнага дабрабыту.

Вадзім КЛЯМЕНЦЬЕЎ: Любая жанчына хоча стаць маці. Мацярынства – самая вялікая каштоўнасць у свеце. Для жанчыны-маці галоўнае – здароўе дзіцяці, дзеля якога яна можа ахвяраваць усім.

Віктар БАБІЧАЎ: Кахання. І толькі кахання. Гэта самае моцнае пачуццё на свеце, якому было прысвечана безліч шэдэўраў і з-за якога распачыналіся войны. Любая жанчына жадае быць каханай, і каханне кліча мужчын на подзвігі. Менавіта ад кахання ўсё пачынаецца: і парадак, і шчасце, і сямейны дабрабыт.

Мікалай ЖУКАЎ:  Не ведаю, чаго хоча жанчына. Хаця вакол мяне адны жанчыны – жонка, дзве дачкі і тры ўнучкі. Жанчына – гэта загадка, якую мужчына на працягу ўсяго жыцця разгадаць не можа. Чаго хоча жанчына – гэта залежыць ад сітуацыі, настрою і многіх іншых умоў. Нам, мужчынам, важна проста адчуваць сваіх любых і дарагіх.

Дарагія жанчыны! Калі ласка, часцей гаварыце мужчынам пра свае жаданні, гаварыце прама, не рытарычнымі пытаннямі і намёкамі. Не спадзявайцеся, што мужчыны прачытаюць вашы думкі і падораць вам такія неабходныя клопат і разуменне.

Мужчыны, памятайце, што ваша меркаванне пра жаданні любімай могуць быць памылковымі, жанчыне трэба падчас зусім не тое, што ў падобнай сітуацыі можа спатрэбіцца мужчыну. І прымайце жанчыну такой, якая яна ёсць.

Апытанне праводзілі Алена КАРПУШЭНКА і Аляксандр ШЭДЗЬКО.

Надрукавана ў №19 ад 07.03.2-19 г.