Атрымаць падзяку прыемна

Валянціна Логвінка, Мікалай Яцушкевіч і Святлана Сыса

Чалавека ў першую чаргу відаць па справах. Калі яны добрыя, то гэта не застаецца без увагі і заслугоўвае заахвочвання. Дзеля гэтай мэты разам са старшынёю раённага камітэта прафсаюза работнікаў аграпрамысловага комплексу Аляксандрам Лузаём едзем павіншаваць пераможцаў спаборніцтваў і ўручыць узнагароды, а таксама грашовыя прэміі.
Першы прыпынак — малочнатаварная ферма “Лодыч” ААТ “Новая Прыпяць”. Цудоўна папрацаваў увесь калектыў, таму атрымаў Дыплом у намінацыі звыш 7500 кг малака на карову за 2018 год і стаў пераможцам штоквартальнага раённага спаборніцтва за дасягненне высокіх паказчыкаў у вытворчасці малака за першы квартал 2019 года.
Узнагароду атрымлівае загадчык фермы Мікалай Яцушкевіч, чалавек, які ведае аб жывёлагадоўлі ўсё і нават больш. Ён узначаліў ферму пасля яе адкрыцця 30 гадоў таму і пры ім жа ў 2016 годзе адбылася маштабная рэканструкцыя. Зараз на ферме 1560 жывёл, з якіх 450 – дойных кароў. Сярэдні надой на кожную – 21 кілаграм.
Дарэчы, рэканструкцыя дазволіла дасягнуць такіх вынікаў. Але самае галоўнае – зладжаны калектыў, які працуе дзеля адной мэты. Гэта аператары машыннага даення Наталля Лазарэнка, Валянціна Логвінка, Святлана Сыса, Святлана Коваль, Ганна Карняйчук і Наталля Траццякевіч. Працэс дойкі пачынаецца з наладжвання абсталявання, чым займаецца слесар Міхаіл Мазоль. Вялікая роля ў дасягненні высокіх надояў належыць і работнікам па абслугоўванні статка – Аляксею Тарасевічу, Мікалаю Сысе, Мікалаю Бобку. За якасцю малака сочыць лабарант Наталля Карняйчук. Прафесіяналізму не пазычаць тэхніку-асемянатару Валянціне Пінчук, а за раздачу кармоў адказвае Іван Сыса.

Надзея Кошман

Аляксей Талмачэвец

Далей з Аляксандрам Ільічом трымаем шлях у Вялікае Малешава, каб за шматгадовую добрасумленную працу, высокі прафесіяналізм і вялікі асабісты ўклад у развіццё прафсаюзнага руху арганізацыі ўзнагародзіць Падзячным пісьмом Столінскай прафсаюзнай арганізацыі работнікаў АПК бухгалтара па таварна-матэрыяльных каштоўнасцях і складах, а таксама старшыню прафкама ААТ “Палессе-АВМ” Надзею Кошман. Яна працуе ў гаспадарцы з 2007 года, пасля таго, як пераехала сюды разам з мужам Уладзімірам – ураджэнцам аграгарадка. Абое вучыліся ў Беларускім дзяржаўным аграрным тэхнічным універсітэце на інжынераў-энергетыкаў. За кароткі час Надзея асвоіла бухгалтарскую справу, а шэсць гадоў таму была выбрана старшынёй прафсаюзнага камітэта. Даводзіцца разбірацца з рознымі жыццёвымі сітуацыямі работнікаў гаспадаркі. Дабрыню і пачуццё гумару лічыць лепшымі якасцямі ў характары чалавека і ўпэўнена: выйсце ёсць з любой сітуацыі.
Адразу дзве нагоды для віншаванняў былі ў Аляксея Талмачэўца – механізатара ААТ “Кароцічы”, куды мы завіталі пасля. Першая – уручэнне Падзячнага ліста ўпраўлення па сельскай гаспадарцы і харчаванні Столінскага райвыканкама за добрасумленную працу і ўдзел у нарыхтоўцы кармоў-2019.
А другая – дзень нараджэння, які механізатар сустрэў на полі. Аляксей Аляксеевіч у гаспадарцы з юнацтва. Яшчэ да арміі сеў за руль машыны, 25 сезонаў адпрацаваў на камбайне, а зараз косіць траву. Выказаў словы падзякі і дырэктар ААТ “Кароцічы” Васіль Кудласевіч, які пажадаў аднаму з лепшых механізатараў яшчэ доўгіх гадоў жыцця і многіх нагод для радасці.
– Атрымаць падзяку прыемна, – прызнаецца імяніннік і спяшаецца да трактара працаваць далей.
Ганна МЕЛЬНІК
Фота аўтара