У Мiнску чакаецца «Queen»-узрушэнне
Вiкторыя ЦЕЛЯШУК
Афiша Прэм’ера гэтага мюзiкла адбылася ў Лондане ў 2002 годзе. Але радкi, якiя далi назву пастаноўцы, набылi статус музычнай легенды значна раней. «We Will Rock You!» — не проста фраза, гэта адзiн з самых знакамiтых хiтоў гурта «Queen». Дакладна перакласцi назву вельмi складана, бо ў слова «рок» у англiйскай мове некалькi значэнняў. Прыкладна лозунг можа гучаць так: «Мы ўзрушым вас!». 25 снежня ўзрушэнне — ва ўсiх сэнсах — чакае Мiнск. У Палацы Рэспублiкi будзе гучаць канцэртная версiя мюзiклу «We Will Rock You», пастаўленая сумесна брытанскiмi музыкантамi i расiйскiмi выканаўцамi.У канцэрт трапiлi 24 песнi з рэпертуару гурта «Queen». Але няправiльна было б меркаваць, што i сам мюзiкл заснаваны на гiсторыi жыцця i смерцi мацнейшага рок-вакалiста ХХ стагоддзя Фрэдзi Мерк’юры. Сюжэт больш нагадвае прыгоднiцкую казку са шчаслiвым фiналам. Дзеянне разгортваецца ў XXIV стагоддзi, а Зямлёй, перайменаванай ва Унiверсамiю, кiруе карпарацыя Глобалсофт — у асобе жудаснай Каралевы. Сусвет нагадвае камп’ютарную гульню: усе людзi аднолькавыя, усе слухаюць адну i тую ж камп’ютарную музыку, а «жывыя» адхiленнi ад нормы прызнаны злачынствам. Аднак галоўны герой Галiлео ўсё ж здолеў даказаць, што справа гурта «Queen» жыве. Як сiмвал перамогi жывой музыкi, Галiлео ў фiнале знаходзiць гiтару аднаго з музыкантаў «Queen»... Аўтарам iдэi i супрадзюсарам мюзiкла спачатку выступiў вядомы амерыканскi кiнаакцёр. У 2003 годзе, пасля ўдалых гастроляў па розных краiнах, мюзiкл «We Will Rock You» быў пастаўлены i ў Маскве. Ягонымi прадзюсарамi выступiлi Сяргей Баранаў i Дзмiтрый Галкiн. Лiбрэта пераклаў на рускую мову вядомы драматург Мiхаiл Мiшын, пастаноўку ажыццявiў не менш вядомы рэжысёр Дзмiтрый Астрахан. Кастынгам выканаўцаў (удзел у iм узялi каля 2000 вакалiстаў i больш як 600 музыкантаў, у тым лiку i з Беларусi) кiравалi непасрэдна ўдзельнiкi гурта «Queen» — гiтарыст Браян Мэй i барабаншчык Роджэр Тэйлар. Нiводнаму нашаму суайчыннiку на кастынгу, на жаль, не пашанцавала. Галоўнымi салiстамi сталi расiйскiя профi Давiд Тодуа, Вера Хатаева, Вольга Белая, Мгер. У лютым 2005 года, пасля шэрагу аншлагавых пастановак, кiраўнiцтва мюзiкла вырашыла стварыць яго гастрольную версiю. Дзеля гэтага частку песень пакiнулi на рускай мове, частку вярнулi да арыгiнала. Дыялогi i другасныя ролi з пастаноўкi знiклi, i сама яна ператварылася ў якасны рок-канцэрт. У дадатак да 24 песень абяцалi два вялiзныя экраны з праекцыямi, а таксама мiнi-феерверк у фiнале. Песнi-хiта, накшталт рускамоўнай версii «Belle» ў мюзiкле «Нотр-Дам дэ Пары», «We Will Rock You» не мае. Бо, на думку прадзюсараў, тут усе кампазiцыi — хiты, да таго ж правераныя часам i пакаленнямi слухачоў.
Чтобы разместить новость на сайте или в блоге скопируйте код:
На вашем ресурсе это будет выглядеть так
Прэм’ера гэтага мюзiкла адбылася ў Лондане ў 2002 годзе
|
|