Аматары камп’ютараў, спiце спакойна!

Источник материала:

Па чутках і на справе

Ужо другi тыдзень беларуская частка сусветнага павуцiння не можа супакоiцца: новая iнфармацыя аб лiквiдацыi лакальных сетак з’яўляецца кожны дзень. Камп’ютаршчыкаў зразумець можна — не будзе iм таннага Iнтэрнэта, знiкне магчымасць абмену iнфармацыяй, музыкай i фiльмамi. Галоўным вiноўнiкам лiчаць УП «Мiнскiя гарадскiя тэлефонныя сеткi».

Карэспандэнт «Звязды» праверыў iнфармацыю. Як высветлiлася, нiякай падставы для хваляванняў няма.

— Лiквiдаваць хатнiя камп’ютарныя сеткi нiхто не збiраецца. Я не ведаю, адкуль з’яўляюцца гэтыя размовы, — адзначыў галоўны iнжынер УП «МГТС» Сяргей Папкоў. — У блiжэйшы час мы будзем праводзiць праверку тэхнiчнага стану тэлефоннай камунікацыi. Калi знойдзем тэлефонныя кабелi, якiя пракладзены без улiку нормаў тэхнiчных патрабаванняў або наогул «нелегальна» — толькi тады мы маем права ажыццявiць дэмантаж.

Дарэчы, праверка стану тэлефоннага кабелю праводзiцца на працягу ўсяго года. I датычыцца яна толькi тых дамоў, якiя абслугоўвае УП «МГТС».

Лiквiдаваць жа хатнiя камп’ютарныя сеткi работнiкi прадпрыемства не маюць нiякага юрыдычнага права. Таму аматары камп’ютараў могуць спаць спакойна. Iншая справа — у нашай краiне пакуль няма заканадаўчай базы, якая б рэгулявала будаўнiцтва камп’ютарных сетак памiж жылымi дамамi. Таму здараецца, што пракладзены яны з парушэннямi тэхнiкi бяспекi, i тэхналагiчных правiлаў. Зараз iдзе гутарка аб упарадкаваннi гэтай з’явы. Як бы там нi было, але лакальныя сеткi працягнуць сваё iснаванне.