Месца сустрэчы — сабор, потым — цырк

Источник материала:

БРСМ удзельнiчае ў акцыi «Нашы дзецi» з пачатку яе заснавання. Яшчэ даўжэй — 13 гадоў — ажыццяўляе праект «У будучае з надзеяй» i 11 гадоў — акцыю «Дзецi думаюць аб дзецях». Усе гэтыя мерапрыемствы БРСМ арганiзоўвае разам з грамадскай арганiзацыяй «Дзiцячы фонд» i Дзяржкамчарнобылем. Гэта вялiзныя праграмы для адораных дзяцей з раёнаў, якiя пацярпелi ад аварыi на Чарнобыльскай АЭС i для малых, якiя засталiся без апекi бацькоў. Вялiкая частка названых праграм ажыцяўляецца раённымi арганiзацыямi Саюза моладзi, бо iх мэта — ахапiць як мага больш маленькiх грамадзян Беларусi, якiя жывуць у аддаленых вёсках, дзiцячых дамах, школах-iнтэрнатах, i падарыць кожнаму адчуванне свята i ўвагу.

Сёлета запланавана таксама вялiкая святочная праграма для пасёлка перасяленцаў Вiшнёўка ў Мiнскiм раёне, для выхаванцаў школы-iнтэрната ў Радашковiчах. Як заўсёды, артысты наведаюць Iвянецкi дзіцячы дом, што на Валожыншчыне.

Цэнтральнай падзеяй сёлетняй акцыi «Нашы дзецi» стане, канешне, традыцыйная калядная Ёлка ў Мiнску з удзелам уладыкi Фiларэта, Мiтрапалiта Мiнскага i Слуцкага, Экзарха ўсяе Беларусi. На гэты раз на Ёлку запрошаны тры тысячы дзяцей з Брэсцкай, Гомельскай i Магiлёўскай абласцей. Як заўсёды, навагодняе свята адбудзецца ў Беларускiм дзяржаўным цырку, якi, паводле слоў яго дырэктара Таццяны Бандарчук, будзе «прыгожым як нiколi». Спачатку дзецi наведаюць Свята-Духаў кафедральны сабор, дзе ўладыка Фiларэт iх блаславiць i ўручыць падарункi ад Экзархата Беларускай праваслаўнай царквы. Пасля гэтага госцi адправяцца ў цырк.