Садовы кампост

Источник материала:

Рубрыку вядзе Валянціна ШПІЛЕЎСКАЯ, тэл. 285-88-81

Травяную зямлю атрымлiваюць пры кампаставаннi травяной масы. Для яе прыгатавання выкарыстоўваюць надземную частку траў, а таксама каранi разам з зямлёй, укладваючы iх у бурты. У кампост добра дадаць торф, гной, молаты вапняк i мiнеральныя ўгнаеннi. На працягу лета бурт палiваюць вадой, фекалiямi або гноевай жыжкай, некалькi разоў пералапачваюць i старанна перамешваюць. Праз год атрымлiваюць рыхлую, структурную зямлю з нейтральнай рэакцыяй. Травяная зямля змяшчае 8—10 працэнтаў гумасу i з’яўляецца выдатным субстратам для раннiх агуркоў, таматаў i ранняй бульбы.

Парнiковую зямлю атрымлiваюць у вынiку двух- цi трохгадовага кампаставання гною i суглiнiстай глебы ў суадносiнах 1:1. У працэсе кампаставання зямлю некалькi разоў перамешваюць, дадаючы пры гэтым мiнеральныя ўгнаеннi, ваду цi гноевую жыжку. Пасля кампаставання парнiковая зямля змяшчае 15—25 працэнтаў арганiчных рэчываў i гумусу, мае нейтральную рэакцыю, у ёй змяшчаецца вялiкая колькасць пажыўных рэчываў. Яна з’яўляецца добрым асяродкам для вырошчвання расады, дэкаратыўных i агародных культур.

Кампосную зямлю атрымлiваюць пры змешваннi кампосту з агароднай зямлёй. У вынiку ўтрыманне гумусу у ёй змяншаецца на 6—8 працэнтаў, а колькасць мiнеральных глiнiстых рэчываў павялiчваецца. Гатовая кампосная зямля мае нейтральную цi шчолачную рэакцыю i прыгодная для вырошчвання агароднiны, пладовых i дэкаратыўных дрэў, ягаднiкаў, кветак.