Удасканальваюцца правы

Источник материала:

Мінiстэрства ўнутраных спраў Беларусi распрацоўвае вадзiцельскае пасведчанне новага ўзору.

Пра гэта паведамiў журналiстам намеснiк кiраўнiка МУС Вiктар Фiлiстовiч. Паводле яго слоў, правы новага ўзору будуць "на ўсе 100 працэнтаў адпавядаць мiжнародным стандартам". У прыватнасцi, яны будуць мець дадатковыя ступенi абароны ад падробак. Апроч таго, у новых дакументах плануецца ў дадатак да iснуючых цяпер катэгорый "А", "B", "С", "D", "Е" ўвесцi "падкатэгорыi" — "А1", "B1", "С1", "D1", "Е1", якiя размяжуюць, напрыклад, кiроўцаў звычайных легкавушак i джыпаў, а таксама вадзiцеляў матацыклаў i скутараў. Новыя правы павiнны з’явiцца ў 2011 годзе. Адказваючы на пытанне "Звязды", Вiктар Фiлiстовiч удакладнiў, што "прымусовай замены iснуючых вадзiцельскiх пасведчанняў у Беларусi з 2011 года не будзе, новыя дакументы атрымаюць асобы, якiя здадуць на правы ўпершыню". А начальнiк сталiчнай Дзяржаўтаiнспекцыi Дзмiтрый Карзюк патлумачыў, што ў выпадку неабходнасцi кожны беларускi аўтааматар зможа абмяняць старыя правы на новыя. Паводле яго слоў, новае вадзiцельскае пасведчанне найперш зробiць больш камфортным наша знаходжанне за мяжой. Напрыклад, з новым пасведчаннем беларусы змогуць без праблем браць напракат аўтамабiлi. І яшчэ. Як паведамiў Вiктар Фiлiстовiч, МУС выступiла з iнiцыятывай прыраўняць да матацыклаў скутары з аб’ёмам рухавiка больш за 50 куб.см. Зразумела, што калi гэта адбудзецца, вадзiцелям скутараў давядзецца здаваць на правы. Ды i кiроўцам памянёных транспартных сродкаў з аб’ёмам рухавiка менш за 50 куб.см таксама неабходна будзе мець спецыяльнае пасведчанне — нешта накшталт дакумента, якi цяпер выдаюць трактарыстам i вадзiцелям iншай сельскагаспадарчай тэхнiкi.  Мiж iншым, Вiктар Фiлiстовiч падкрэслiў, што цяпер, напрыклад, у вясковых юнакоў i дзяўчат фактычна няма праблем з атрыманнем пасведчання на права кiравання матацыклам. Паводле яго слоў, ва ўсiх раёнах пры мясцовых аддзелах ДАI створаны адмысловыя бясплатныя курсы.

Мiкола ДЗЯБЁЛА.