Вера і розум як спадарожнiкi ў дарозе

Источник материала:

Адразу пасля ўрачыстай сустрэчы ў аэрапорце Дзяржаўны сакратар Яго Святасцi Бенядыкта ХVI кардынал Тарчызiо Бэртонэ накiраваўся ў цэнтр "Карытас" у Ляскоўцы, дзе жывуць дзецi, якiя хварэюць на рак. Сустрэч i важных размоў у Беларусi будзе яшчэ шмат за гэтыя днi, але гэтая... Для дзетак — нiбыта вестачка ад Бога, у якога ёсць надзея на выздараўленне. Высокi госць нагадаў, што Хрыстос сваiм служэннем пачынаў лекаваць хворых, i ягоная любоў дае надзею на будучыню. Кардынал Бэртонэ сказаў, што спачувае цярпенню дзетак, якiя пакутуюць. Яны, вiдаць, гэта адчулi, таму што ў адказ падаравалi яму мяккую цацку. Кардынал прыняў падарунак i сказаў, што мае шмат пляменнiкаў, у якiх 20 дзяцей, — iм ён прывязе цацку з Беларусi. Кардынал пачаў свой вiзiт у нашу краiну са спраў дабрачыннасцi. Але ўжо на наступны дзень Дзяржаўнага сакратара Яго Святасцi чакалi важныя сустрэчы з дзяржаўнымi асобамi i не толькi.

Госця з Ватыкана прынялi ў рэзiдэнцыi Патрыяршага Экзарха ўсяе Беларусi Мiтрапалiта Мiнскага i Слуцкага Фiларэта. Праваслаўныя i каталiкi складаюць дзве самыя буйныя канфесii ў Беларусi i з даўнiх часоў вучылiся суiснаваць на гэтай зямлi.

Вiтаў высокага госця Ўпаўнаважаны па справах рэлiгiй i нацыянальнасцяў Леанiд Гуляка, якi на сустрэчы з iм падкрэслiў, што адзiн з асноўных накiрункаў працы камiтэта — праца менавiта з рэлiгiйнымi арганiзацыямi. "Паводле заканадаўчай базы, мы не кантралюем дзейнасць рэлiгiйных арганiзацый. Мы кантралюем выкананне закона як рэлiгiйнымi арганiзацыямi, так i органамi ўлады", — адзначыў Леанiд Гуляка. Кардынал Тарчызiо Бэртонэ перадаў удзячнасць за свабоду рэлiгiй, якая ёсць у Беларусi.

Пытанням веры госць прысвяцiў сваю лекцыю ў БДУ. Прамаўляючы для маладых людзей, кардынал засяродзiўся на суадносiнах веры i розуму, разважаў пра тое, як можна гаварыць пра Бога сучаснаму чалавеку. Кардынал Бэртонэ прысвяцiў сябе Богу ў маладым узросце, ён стаў святаром у 26 гадоў. Псiхалогiю студэнтаў i маладых людзей ведае, бо сам выкладаў тэалогiю ў папскiм унiверсiтэце ў Рыме, нават быў яго рэктарам.

Два гады таму кардынал стаў дзяржсакратаром Ватыкана, ён адказвае за палiтычныя i дыпламатычныя дзеяннi Ватыкана. Ён кiраўнiк урада Ватыкана i адначасова мiнiстр замежных спраў. Таму была запланаваная сустрэча з мiнiстрам замежных спраў Беларусi Сяргеем Мартынавым. I госць, i гаспадары спадзяюцца на тое, што вiзiт у нашу краiну будзе плённым.

Ларыса ЦIМОШЫК.

Фота БЕЛТА