Мянцюк хаваўся ў Маскве...

Источник материала:

Раман Мянцюк, якi на трасе "Мiнск—Мiкашэвiчы" пратаранiў "жывую заслону", а пасля таго, як у дачыненнi да яго была ўзбуджана крымiнальная справа знiк, затрыманы. Яго разам з жонкай Вольгай супрацоўнiкi беларускай мiлiцыi разам з расiйскiмi калегамi адшукалi ў Маскве, куды ён прыехаў з Нарафамінска, каб працаўладкавацца.

Нагадаем, што Мянцюк, якi не меў вадзiцельскага пасведчання, 2 сакавiка сеў за руль "Фольксвагена-Гольф" п’яным i на хуткасці 160 кiламетраў у гадзiну пратараніў тры машыны, у салоне якiх знаходзiлiся вадзiцелi i пасажыры. На шчасце, тады абышлося без смяротных ахвяраў, але 5 чалавек пацярпелi.

Мiж iншым, Мянцюк i да гэтага рэзананснага здарэння меў непрыемнасцi з законам. У прыватнасцi, быў пазбаўлены вадзiцельскага пасведчання за кiраванне аўто ў нецвярозым стане. Акрамя таго, ён адбываў пакаранне за крадзеж, угон, хулiганства. Калi ж "гора-вадзiцель" знаходзiўся ў вышуку, у дачыненнi да яго была ўзбуджана яшчэ адна крымiнальная справа: падазраецца Мянцюк у тым, што абакраў у Гомелi сваю былую сяброўку. На момант вёрсткi гэтага нумара было вядома, што ў Маскве вырашаецца пытанне аб экстрадыцыi Менцюка ў Беларусь. Як паведамiлi карэспандэнту "Звязды" ў аддзяленнi iнфармацыi i грамадскiх сувязяў УУС Мiнаблвыканкама, учора ён быў дастаўлены ў суд i пэўнае рашэнне павiнна быць прынята ў блiжэйшы час. Што ж датычыцца яго жонкi, то яна пакуль адпушчана. Справа ў тым, што таго артыкула, па якiм яна абвiнавачваецца ў нас, а менавiта перадача кiравання транспартным сродкам асобе, якая знаходзiцца ў нецвярозым стане, у расiйскiм заканадаўстве няма.