ПРЫГОЖЫЯ ДЗВЕРЫ Ў ЖЫЦЦЁ

Источник материала:

Калi работу вытворчага калектыву станоўча ацэньвае кiраўнiк урада, калектыву нiчога iншага не застаецца, як адпавядаць такой ацэнцы i надалей. Летась Сяргей Сяргеевiч Сiдорскi падчас свайго знаходжання ў Паставах наведаў ПВУП "Пастаўскi мэблевы цэнтр" (ПМЦ), цiкавiўся перспектывамi далейшага развiцця дрэваапрацоўкi ў рэгiёне. Пры гэтым было падкрэслена, што пры арганiзацыi новых вытворчасцяў за аснову будуць узяты вопыт, напрацоўкi, тэхналогii Пастаўскага мэблевага цэнтра.

Прадпрыемства ўзнiкла крыху больш за дзесяць гадоў таму як прыватная iнiцыятыва былых ваенных. Магчыма, якраз гэтым усё i тлумачыцца — менавiта для ваенных характэрны ўменне вызначыць задачу, настойлiвасць у дасягненнi мэты, дысцыплiнаванасць у працы.

Цэнтр спецыялiзуецца на вытворчасцi дзвярных i аконных блокаў — у асноўным з масiву сасны. За параўнальна кароткi тэрмiн створана сучаснае дрэваапрацоўчае прадпрыемства, на якiм устаноўлена тэхналагiчнае абсталяванне вядучых еўрапейскiх фiрмаў. ПМЦ стаў адным з буйнейшых вытворцаў гэтага вiду прадукцыi не толькi ў Беларусi, але i на ўсёй постсавецкай прасторы. Прадукцыя канкурэнтаздольная як на ўнутраным, так i на замежным рынках. Прыярытэт аддаецца дзвярам — уваходным (для грамадскiх будынкаў, офiсаў i жылых памяшканняў) i мiжпакаёвым (глухiм i асцекленым), з фрэзiраваным на iх паверхнi малюнкам. Сёння яны ўпрыгожваюць праваслаўную царкву i касцёл у Паставах, будынак Беларускай гандлёва-прамысловай палаты ў сталiцы, там жа — адмiнiстрацыйныя будынкi Мiнсувязi, Белэнерга, iх падраздзяленняў у раёнах i многiя iншыя.

Праўда, тэрмiн "многiя" варта прыняць з пэўнай доляй умоўнасцi. Прадпрыемства арыентавана на экспарт, i большая частка прадукцыi iдзе за мяжу — у Расiю, Польшчу, ва Украiну, у Ізраiль, Прыбалтыку, Казахстан, Узбекiстан, Таджыкiстан, Iрак. Адгружаецца нават на адрас заканадаўцы моды ў вытворчасцi мэблi i дрэваапрацоўцы наогул — у Iталiю. Чым не можа пахвалiцца нiводнае прадпрыемства, якое займаецца вытворчасцю дзвярэй. Па вынiках 9 месяцаў экспарт склаў 80,6 працэнта, а ўвогуле ў некаторыя месяцы ён дасягае 91 працэнта. Тым не менш беларусам не варта хвалявацца — дзверы з маркай Пастаўскага мэблевага цэнтра можна купiць на рынку ў Ждановiчах i на мэблевым рынку ва Уруччы, а таксама ў буйных гандлёвых прадпрыемствах, такiх, як "ОМА", i больш дробных, нават у прыватных прадпрымальнiкаў.

Галоўныя сакрэты поспеху мы назвалi вышэй. Ёсць у iх лiку таксама i прафесiйная, творчая работа канструктарскай службы. Не будзем здымаць з рахунку i надзвычай уважлiвыя адносiны да сыравiны — прадпрыемства працуе з такой сур’ёзнай арганiзацыяй, як "Беллесэкспарт" (адтуль атрымлiвае асноўную долю сыравiны), з буйнымi беларускiмi лясгасамi. А прыёмку драўнiны, калi гэта новыя пастаўшчыкi, ажыццяўляюць патрабавальныя эксперты Беларускай гандлёва-прамысловай палаты.

— Сёння попыт на прадукцыю расце, мы маем дастаткова заказаў, нават iснуе чарга. У аддзеле маркетынгу ўсе адгрузкi на дзверы распiсаны на месяц наперад. Па вокнах прынятых заказаў — на 3-4 месяцы наперад.

Моду на вокны з ПВХ тут не лiчаць для сябе памехай.

— Нiчога не хачу сказаць пра вокны з ПВХ, але што датычыцца экалагiчнасцi, цеплаправоднасцi, то нашы — дамiнуюць. Тым больш, што выконваем iх у паўночным варыянце. I цана на нашы вокны не вельмi адрознiваецца ад цаны на ПВХ. Дарэчы, станоўча адбiваецца на сабекошце, а значыць i на цане прадукцыi тое, што нашы кацельнi працуюць на адходах уласнай вытворчасцi. Палiва ў нас — таннае, i тэхналагiчнае цяпло для вытворчых патрэбаў — таксама.

Мы штомесяц павялiчваем аб’ёмы вытворчасцi. У гэтым непасрэдная заслуга дырэктара Анатоля Мiхайлавiча Бабiчава i ўсяго калектыву. Устанавiлi дадатковыя лiнii па распiлоўцы круглага лесу, адкрылi новую вытворчасць па вырабе пiлет — палiўных гранул з адходаў драўнiны, што дазволiць займацца паглыбленай перапрацоўкай драўнiны.

Наша прадукцыя мае беларускi i расiйскi сертыфiкаты адпаведнасцi. На якасць напрамую працуе i тое, што ў нас устаноўлена сучаснае фарбавальнае абсталяванне. Шмат станкоў з лiчбавым праграмным кiраваннем, дзякуючы чаму дасягаецца дакладнасць апрацоўкi дэталяў. Абсталяванне — сучаснае, тым не менш яно штогод абнаўляецца. I ўсё гэта напрамую працуе на якасць.

Наведваем выстаўкi за мяжой, перш за ўсё ў Iталii, Германii, а таксама ў Беларусi. Стараемся быць у курсе ўсiх навiнак дрэваапрацоўкi i ўкараняць iх у сябе.

Стала ўжо звыклым, што на галiновых выстаўках на дрэваапрацоўчым абсталяваннi, якое прывезена арганiзатарамi выставы з-за мяжы, ужо ў першы дзень яе работы з’яўляецца таблiчка: "Прададзена ўнiтарнаму прадпрыемству "ПМЦ". I пасля завяршэння выставы тры-чатыры адзiнкi абсталявання экстра-класа адпраўляюцца ў Паставы.

На цэнтр едуць дэлегацыi: паглядзець, павучыцца. Прыязджаў Ларан Арынiч, генеральны дырэктар знакамiтага "Пiнскдрэва". Сказаў, што падгледзеў што-нiшто карыснае i для сябе. Здаецца, гэта не было звычайнай ветлiвасцю.

Кiраўнiк адной з дэлегацый задаў пытанне: а што за iнстытут займаўся такой рацыянальнай расстаноўкай абсталявання, якая ў вынiку забяспечыла найбольш эфектыўнае выкарыстанне магчымасцяў тэхналагiчнага ланцужка? I вельмi здзiвiўся, калi яму сказалi, што гэта зрабiлi самi, пад кiраўнiцтвам Анатоля Мiхайлавiча.

— Варта зазначыць таксама i тое, што нас заўсёды падтрымлiвалi мясцовыя ўлады, — падкрэслiвае Генадзь Бернардавiч. — Прычым падтрымка аказваецца ўсебаковая. Мы таксама iдзём насустрач, перш за ўсё тым, што пастаянна арганiзуем новыя рабочыя месцы. Зараз толькi ў нашым калектыве занята 740 чалавек, i яшчэ 100 — на нядаўна створаным даччыным прадпрыемстве. У нас працуюць цэлыя дынастыi, значыць, людзi нам давяраюць.