Чытаў бы ЗВЯЗДУ — зэканомiў бы $1800

Источник материала:

А адбылося наступнае: не так даўно (некалькi месяцаў таму) мы расказалi сумную гiсторыю, у якую трапiў пенсiянер адной з вёсак Нараўлянскага раёна. Ён атрымаў эсэмэску аб тым, што выйграў легкавушку ў адной акцыi, што праводзiлася ў Расiйскай Федэрацыi, а каб даставiць аўто ў Беларусь, шчаслiўчык павiнен пералiчыць на названы рахунак пэўную суму "зялёных". Пасля гэтага паведамлення было некалькi званкоў па мабiльнiку, i дзядок пераслаў тыя грошы. А калi ўпэўнiўся, што яго не проста "прыкалолi", а абвялi вакол пальца, нiбы малое дзiця, звярнуўся ў мiлiцыю.

Дык гэта ж дзядуля, якому ўжо за семдзесят. А ў нашым выпадку 30-гадовы гамяльчанiн, работнiк аднаго сумеснага прадпрыемства, трапiў на кручок невядомых прайдзiсветаў. У вераснi праз тыя ж эсэмэскi i перамовы па сотавiку яму прапанавалi перавесцi ў адну з фiрмаў Расii 1800 долараў па сiстэме WЕSTERN UNІОN 1800 долараў за выйграны iмi аўтамабiль суперкласу. На наступны дзень гэта i было зроблена.

А днямi мужчына падаў заяву ў мiлiцыю — няма нi грошай, нi легкавушкi. Нiхто па ўказаным нумары мабiльнiка не адказвае. Што рабiць? Мiлiцыя раiць: трэба быць пiльным. А мы ў сваю чаргу — выпiсвайце i чытайце "Звязду". Тады вы будзеце кампетэнтнымi ва ўсiх пытаннях.