Крызiс — з’ява часовая. Заўсёды трэба спадзявацца на лепшае

Источник материала:

— Справы, калi шчыра, у нас цяпер не самыя лепшыя, — распавядае Святаслаў Чарняўскi, генеральны дырэктар прыватнай фабрыкi "Васiлiна", якая працуе ў Вiцебскiм раёне. — Мы займаемся вырабам панчох, шкарпэтак вось ужо 11 гадоў. У Расiю адпраўляем да 70 працэнтаў нашай прадукцыi. Пасля таго як банкаўская сiстэма ў Расii фактычна трапiла ў крызiсны стан, адразу мы адчулi гэта на сабе. Плацяжы адтуль зацягваюцца, рэзкае знiжэнне курсу расiйскага рубля ў адносiнах да беларускага вельмi дрэнна адбiлася на нашых заробках... У нашым калектыве ўсяго 100 чалавек. І звальняць нiкога не плануем. Упэўнены, крызiс — з’ява часовая. Заўсёды трэба спадзявацца на лепшае.

Цiкава, а як цяпер трымаюцца будаўнiчыя арганiзацыi?

Вялiкi калектыў знакамiтага "Вiцебскага домабудаўнiчага камбiната" (а ўсяго тут працуе больш за 3 тысячы чалавек) не можа не глядзець у будучыню з аптымiзмам. Менавiта прадстаўнiкi гэтага калектыву займалiся рэканструкцыяй комплексу Летняга амфiтэатра, працавалi i працуюць на iншых вядомых аб’ектах. Тут зарплата ў сярэднiм больш за 1 мiльён рублёў. Напэўна, таму i няма дэфiцыту працаўнiкоў. Намеснiк генеральнага дырэктара Вiктар Лапiн шчыра ганарыцца тым, што камбiнат, бадай, адзiны ў краiне, стварае жыллёва-будаўнiчыя кааператывы. Усяго запланавана пабудаваць тры жылыя дамы. Разглядаецца пытанне нават аб аказаннi фiнансавай дапамогi тым, хто будуе жыллё.

Намеснiк старшынi Вiцебскага аблвыканкама Вiктар Нiкалайкiн адзначыў, што i падчас крызiсу многiя прадпрыемствы ў рэгiёне развiваюцца. Пастаўскi хлебазавод, напрыклад, асвоiў новыя вiды прадукцыi. I Глыбоцкi кансервавы камбiнат вырабляе 6 дадатковых найменняў, якiя можна сёння прапаноўваць на знешнiя рынкi. Дынамiчна развiваецца вiцебскi камбiнат "Вiцьба" — практычна прама з канвеера сыходзiць на рэалiзацыю салодкая прадукцыя не толькi на мясцовы рынак. Ёсць заяўкi i на знешнiя. Трэба ўстанаўлiваць дадатковую лiнiю. На "Нафтане" прасiлi паболей чыгуначных цыстэрнаў, каб адпраўляць прадукцыю. Паводле ягоных словаў яшчэ не ўсе кiраўнiкi прадпрыемстваў актыўныя ў правядзеннi рэкламных кампанiй. "Мала вырабiць якасную прадукцыю, трэба навучыцца яе прадаваць", — падкрэслiў намеснiк губернатара. — Продаж айчынных тавараў, i не толькi падчас крызiсу, — вельмi актуальная задача...