За тых, хто ў моры!

Источник материала:

19 лютага адзначаецца Сусветны дзень кiтоў. Заснаваны ён быў у 1986 годзе, калi Мiжнародная кiтовая камiсiя спынiла больш як 200-гадовае бязлiтаснае вынiшчэнне гэтых марскiх млекакормячых i ўвяла забарону на камерцыйны кiтовы промысел.

Права на паляванне было захаванае толькi для некаторых карэнных народнасцяў — абарыгенаў Чукоткi, Аляскi, Грэнландыi i карыбскай краiны Сент-Венсiнт i Грэнадзiна, для якiх гэты промысел з’яўляецца "традыцыйнай асновай жыццядзейнасцi", i для навукоўцаў — у даследчых мэтах. Дый тым кiтовая камiсiя штогод выдзяляе пэўны лiмiт здабычы. Мараторый дзейнiчае i цяпер — паляванне на кiтоў i гандаль iх мясам ва ўсiм свеце забаронены. Праўда, з яго па ўласнай волi выйшлi Нарвегiя (у 1993 годзе) i Ісландыя (у 2006), дзе камерцыйная здабыча кiтоў вядзецца.

Дарэчы, гэты дзень лiчыцца днём абароны не толькi кiтоў, але ўвогуле ўсiх марскiх млекакормячых. Часта эколагi аб’ядноўваюцца i прысвячаюць дзень аднаму канкрэтнаму ўнiкальнаму iх вiду, якому пагражае небяспека знiкнення.

Напрыклад, у 2007 годзе група навукоўцаў абвясцiла аб магчымым знiкненнi з твару зямлi кiтайскага азёрнага дэльфiна. Калi хоць адзiн экзэмпляр не будзе знойдзены ў найблiжэйшыя гады, Сусветны саюз аховы прыроды прызнае гэты вiд вымерлым — прычым, у вынiку дзейнасцi чалавека... Таму абарона патрэбна ўсiм iм — ад сiняга кiта, самага вялiкага млекакормячага на планеце, да самага рэдкага насельнiка мораў — мiжземнаморскага цюленя-манаха.