Кібервыклiкi

Источник материала:

У Беларусi пачашчаюцца выпадкi камп’ютарных злачынстваў

Упершыню сутыкнуцца са злачыннасцю ў iнфармацыйнай прасторы праваахоўным органам Беларусi давялося больш як дзесяць гадоў таму. I сёння на гэту праблему не могуць закрываць вочы нi праваахоўныя органы, нi правайдары, нi карыстальнiкi. Несуцяшальную дынамiку кiберзлачыннасцi прывёў Iгар Чарненка, начальнiк упраўлення па раскрыццi злачынстваў у сферы высокiх тэхналогiй МУС, на семiнары па праблемах папярэджання гвалту ў СМI i сетцы iнтэрнэт. Летась было выяўлена 1614 злачынстваў — iстотна больш, чым у 2007 годзе (996 злачынстваў), што ўжо казаць пра 1998 год (толькi чатыры выпадкi)...

Пры гэтым колькасць кiберзлачынстваў расце прапарцыянальна павелiчэнню камп’ютарнага парка краiны i колькасцi карыстальнiкаў — запэўнiў начальнiк упраўлення. Паводле прыведзенай iм iнфармацыi, у 2000 годзе на 100 сем’яў у Беларусi даводзiлася два камп’ютары, а праз сем гадоў — ужо 26. Ёсць i лiчбы, якiя дазваляюць ацанiць распаўсюджанасць iнтэрнэту — сёння ў краiне каля трох мiльёнаў карыстальнiкаў, паслугi якiм прапануюць больш як 38 правайдараў. Iгар Чарненка развеяў мiф пра тое, што хакеры, — як правiла, дзецi i падлеткi: у Беларусi пераважная большасць злачынцаў у сферы iнфармацыйнай бяспекi — дарослыя людзi, якiя часцей за ўсё маюць карыслiвыя матывы, а не жаданне прадэманстраваць свой узровень камп’ютарнага майстэрства. Таму нярэдкiя i выпадкi вымагання праз iнтэрнэт...

Спадар Чарненка падкрэслiў, што заканадаўства Беларусi ў сферы барацьбы з кiберзлачыннасцю патрабуе ўдасканалення i далейшага развiцця. "Неабходна заканадаўча рэгламентаваць парадак узаемадзеяння iнтэрнэт-правайдараў з праваахоўнымi органамi, перш за ўсё вызначыць тэрмiны i меры забеспячэння захаванасцi базы звестак аб трафiку".

Падчас семiнару кампетэнтныя асобы праваахоўных органаў, навукоўцы азнаёмiлi журналiстаў не толькi з юрыдычнымi, але i псiхалагiчнымi, сацыялагiчнымi аспектамi асвятлення крымiнальнай тэматыкi.