Беларускія сіноптыкі распавялі пра надвор'е на Новы год

Беларускія сіноптыкі агучылі прагноз надвор'я да пачатку наступнага тыдня. У апошнія дні 2018 года тэмпература паветра будзе перавышаць кліматычную норму на 3-5 градусаў, інфармуе БЕЛТА.

У пятніцу, 28 снежня, на працягу дня чакаецца ад -4 да +2 градусаў (на Брэстчыне — 3-5 цяпла). Пройдзе снег, мокры снег (на паўднёвым захадзе — з дажджом). Такія ж ападкі чакаюцца і ў суботу, 29 снежня. У начныя гадзіны будзе ад -1 да -7 градусаў (на Віцебшчыне — да -9, на Брэстчыне — ад 0 да +2), у дзённыя — ад -5 на Гомельшчыне да +3 на захадзе краіны. У нядзелю, 30 снежня, на Брэстчыне зноў жа магчымы мокры снег з дажджом. Уначы прагназуецца ад -4 да +2 градусаў (у Гомельскай вобласці — да -6), удзень — ад -2 на ўсходзе да +4 у Брэсцкай вобласці.

У панядзелак, 31 снежня, амаль па ўсёй краіне пройдзе снег, мокры снег. У навагоднюю ноч чакаецца ад -6 да +1 градуса, удзень — ад -4 да +2.

1 студзеня 2019 года ў начныя гадзіны прагназуецца ад 0 да -6 градусаў (на Віцебшчыне пры праясненнях — да -8), у дзённыя — ад -5 на ўсходзе да +3 на захадзе. Кароткачасовы снег магчымы толькі месцамі.