Пенсіянеры ў Беларусі змогуць значна павялічыць памер пенсіі пры больш познім выхадзе на яе

Источник материала:

Адпаведны ўказ № 136 "Аб мерах па ўдасканаленні пенсійнага забеспячэння грамадзян" Прэзідэнт Беларусі падпісаў 18 сакавіка.

Дакументам прадугледжана, што пры прадаўжэнні работы без атрымання дзяржаўнай пенсіі па ўзросце пасля набыцця права на яе памер пенсіі прагрэсіўна павялічваецца:

за першы год — на 6 працэнтаў заробку, які прымаецца для вылічэння пенсіі;

за два гады памер павышэння складзе 14 працэнтаў (павышэнне на 8 працэнтаў за другі год работы падсумоўваецца з павышэннем на 6 працэнтаў за першы год);

за тры гады — 24 працэнты (14 працэнтаў за два гады плюс 10 працэнтаў за трэці год);

за чатыры гады — 36 працэнтаў (24 працэнты за тры гады плюс 12 працэнтаў за чацвёрты);

за пяты і кожны наступны год прадугледжваецца павышэнне памеру пенсіі на 14 працэнтаў заробку, якія таксама падсумоўваецца з працэнтамі павышэння, устаноўленымі за папярэдні перыяд (за 5 гадоў — 50 працэнтаў, за 6 гадоў — 64 працэнты).

У адпаведнасці з раней дзеючым заканадаўствам прадугледжвалася павышэнне памеру пенсіі па ўзросце за работу пасля дасягнення агульнаўстаноўленага пенсійнага ўзросту без атрымання пенсіі на 1 працэнт заробку, які прымаецца для вылічэння пенсіі, за кожныя 2 поўныя месяцы такой работы. Так, калі жанчына, якая мае стаж работы 37 гадоў, выйшла на пенсію ў 55 гадоў, то памер яе пенсіі складзе Br1401 тыс. Пры звароце праз 5 гадоў пасля надыходу пенсійнага ўзросту памер яе пенсіі пры раней дзеючай норме павялічыўся б на Br642 тыс., або на 45,8 працэнта, і склаў бы Br2043 тыс. У адпаведнасці з новымі нормамі яе пенсія за адкладзены выхад на 5 гадоў узрасце на Br1031 тыс., або на 73,6 працэнта, і будзе складаць Br2433 тыс.

Акрамя таго, у адпаведнасці з указам павялічыцца выплата па ўжо набытых правах на павелічэнне памеру пенсіі за адкладзены выхад на яе.

Указам таксама прадугледжваецца пры вылічэнні заробку для працоўнай пенсіі ўлічваць залічаныя ў стаж работы перыяды дзейнасці, на працягу якіх не праводзілася выплата абавязковых страхавых узносаў у фонд.

У адпаведнасці з заканадаўствам пры вылічэнні пенсіі ў стаж нараўне з работай, калі праводзіцца выплата ўзносаў, уключаюцца перыяды іншай дзейнасці, на працягу якіх узносы не выплачваюцца (ваенная служба, вучоба на дзённай форме атрымання адукацыі, догляд дзяцей, інвалідаў І групы і састарэлых, якія дасягнулі 80-гадовага ўзросту). Пры вызначэнні заробку такія перыяды прапускаюцца.

З улікам таго, што пры вылічэнні пенсій кожны год стажу ацэньваецца ў працэнтах ад заробку, а заробкі ва ўсіх розныя, то аднолькавыя па сваім змесце перыяды маюць у пенсіі розную вартасць.

Указам устаноўлена адзіная вартасць усіх перыядаў без выплаты ўзносаў пры назначэнні пенсіі і ўключэнне такіх перыядаў пры разліку заробку.

Як растлумачылі ў прэс-службе, устанаўленне больш важкай даплаты за адкладзены зварот па пенсію, уніфікацыя вартасці перыядаў без выплаты ўзносаў і ўключэнне іх пры разліку заробку ў комплексе будуць садзейнічаць зніжэнню прытоку пенсіянераў і павышэнню эфектыўнасці дзяржаўных расходаў.

Гэтыя нормы будуць распаўсюджвацца на сённяшніх работнікаў, якія яшчэ фарміруюць свае правы на пенсійнае забеспячэнне.

Прэс-служба Прэзідэнта Рэспублікі Беларусь.