Магілёўская адаптацыя

Источник материала:

Старшыня Магілёўскага аблвыканкама Пётр Руднік сустрэўся з журналістамі і расказаў пра надзённыя пытанні развіцця рэгіёна.

Эканоміка

— Прамысловасць Магілёўскай вобласці адаптавалася да новых умоў гаспадарання, — зрабіў выснову Пётр Руднік.

Па выніках за 4 сёлетнія месяцы, аб'ёмы прамысловай вытворчасці павялічыліся на 16,1  % у параўнанні з леташнім паказчыкам. Аднак, па словах кіраўніка вобласці, яшчэ шмат трэба зрабіць, асабліва ў сэнсе інавацый.

— У нас сёлета ў вышэйшых навучальных установах 6600 выпускнікоў, — паведаміў Пётр Руднік. — Усе яны пішуць дыпломныя работы, але мець практычную значнасць, можа быць, будуць толькі 259. Трэба гэту сітуацыю паправіць і падняць звязку "універсітэт — прадпрыемства" на іншы ўзровень.

Сёлета ўлады мяркуюць увогуле пазбавіцца стратных прадпрыемстваў: цяпер іх 84 з 1019, альбо 8,2 %. Яшчэ адна значная задача — павелічэнне рэнтабельнасці вытворчасці. Болей за палову прадпрыемстваў маюць рэнтабельнасць 5 і меней працэнтаў, у той час як паказчык ад 15 % і вышэй дае магчымасць прадпрыемству развівацца, выдаткоўваць грошы на інвестыцыі.

Заробкі

Яшчэ ў студзені работнікі 368 арганізацый у Магілёўскай вобласці мелі сярэдні заробак, ніжэйшы за 200 долараў. Цяпер такіх засталося толькі 100.

З іх — 57 бюджэтных арганізацый сферы адукацыі . Гэта яслі-садкі, у асноўным у Бабруйску. У спісе таксама тры дзясяткі сельскагаспадарчых прадпрыемстваў, дзе кіраўнік вобласці абяцае навесці парадак.

— Мы параўналі сярэднюю плату ў арганізацыях і заробак іх кіраўнікоў, — расказаў Пётр Руднік. — Я звярнуў увагу на тое, што, напрыклад, ва УКСП "Краснапольскі", адзінай гаспадарцы ў Краснапольскім раёне, сярэдні заробак работнікаў складае 348 тысяч рублёў, а ў кіраўніка — 1 мільён 702 тысячы рублёў. Я лічу, што сёння гэта непарадак.

Напрыканцы гэтага года сярэдні заробак у Магілёўскай вобласці павінен дасягнуць 444 долары.

— Сумеснымі высілкамі ўрада, абласной выканаўчай улады і гаспадарнікаў трэба выканаць задачу, як бы ні было цяжка, — пацвердзіў старшыня аблвыканкама. — Сёлета Год якасці — якасці жыцця, дабрабыту людзей.

Асабістыя падсобныя гаспадаркі

Пётр Руднік даручыў вырашыць усе праблемы са зборам малака ў насельніцтва, каб болей не было скаргаў на гэты конт.

— Паводле справаздачы, для належнай арганізацыі працы патрабуюцца 98 камплектаў збруі, 259 фурманак, 2 тысячы бітонаў і больш за сотню прыбораў вымярэння тлустасці, — паведаміў кіраўнік вобласці. — На закупку трэба выдаткаваць 2,3 мільярда рублёў.

Літаральна на наступным тыдні будуць закуплены бітоны, вупраж і фурманкі. Для чаго цяпер у рэгіёне тэрмінова шукаюць вытворцаў гужавых фурманак.

Між тым, аб'ёмы вытворчасці асабістых падсобных гаспадарак штогод памяншаюцца: старыя не могуць, маладыя не хочуць.

— Навязваць гаспадаркі мы нікому не будзем, але тых, хто хоча займацца гэтым, павінны падтрымаць, — вызначыўся Пётр Руднік. — Усе лішкі ад асабістых гаспадарак мы купім і перапрацуем.

Працоўныя месцы

Праблема занятасці людзей застаецца актуальнай у посткрызіс. Нават нягледзячы на тое, што вобласць выконвае даведзены паказчык па ўзроўні беспрацоўя: цяпер ён не перавышае 1 %.

Аднак невыпадкова сёлета ўсе сельскія раёны і гарады павінны стварыць 5-10 новых прадпрыемстваў. Увогуле па рэгіёне іх павінна быць 250, і 87 да гэтага часу ўжо запрацавалі. Новыя прадпрыемствы — гэта не толькі новыя працоўныя месцы, але і дадатковыя паступленні ў мясцовыя бюджэты і ажыццяўленне праектаў.

Маніторынг

У Магілёўскай вобласці , як і ў іншых рэгіёнах, гэтымі днямі працуе міжведамасная рабочая група, якая робіць маштабны маніторынг працы дзяржаўных органаў па вырашэнні сацыяльна значных праблем насельніцтва і якасці працы са зваротамі грамадзянаў.

— Я стаўлюся да гэтай праверкі толькі станоўча, — заявіў Пётр Руднік, і далей растлумачыў сваю пазіцыю на прыкладзе.

На тэрыторыі Бялыніцкага раёна ёсць месца, якое называюць мядзведжым кутам. Гэта ў раёне чыгуначнай станцыі Друць, на мяжы чатырох раёнаў. На тэрыторыі УКСП "Падзевічы" тры дзясяткі населеных пунктаў, цэнтрам якіх з'яўляецца вёска Заполле. Старажытны край са сваімі традыцыямі, але апынуўся ў заняпадзе. Заўвагу на гэты конт зрабіў кіраўніцтву Магілёўскай вобласці Аляксандр Лукашэнка.

Цяпер там разгарнулася шырокае будаўніцтва: фермы, пабудовы 1953 года, разбураюцца, замест іх узводзіцца новы комплекс на 500 галоў жывёлы. Днямі ў Заполлі адбудзецца семінар, які дазволіць зрабіць высновы наконт развіцця глыбінкі і рухаць там прагрэс.

— Правядзенне планавай праверкі ва ўсіх рэгіёнах дазволіць сёння вызначыць болевыя кропкі пры выкананні Дырэктывы № 2, — лічыць Пётр Руднік. — Звароты грамадзян — гэта важна, і вырашэнне праблем, якія ўзнікаюць у людзей, — задача выканаўчай улады.

Ілона Іванова.