Хто будзе плаціць па поўным тарыфе?

Наогул, на мінулым тыдні раённая камісія правяла два пасяджэнні. Першае – выязное –  адбылося ў Обалі. На пасяджэнне былі запрошаны грамадзяне працаздольнага ўзросту, якія нідзе не працуюць і трапілі ў базу грамадзян, не занятых у эканоміцы. Гэтыя грамадзяне з’яўляюцца наймальнікамі ці ўласнікамі жылых памяшканняў і з 1 кастрычніка 2019 года будуць аплачваць ацяпленне па поўным кошце. З грамадзянамі правялі індывідуальныя гутаркі, растлумачылі асноўныя палажэнні і патрабаванні Дэкрэта №3 “Аб садзейнічанні занятасці насельніцтва”, прапанавалі розныя варыянты працаўладкавання ці іншыя віды самазанятасці. Такія выязныя пасяджэнні плануецца правесці ў кожным сельсавеце.

У апошні дзень лютага прайшло пасяджэнне камісіі, на якім, па-першае, на той ці іншы тэрмін былі выключаны з базы незанятых у эканоміцы грамадзяне, якія прадставілі дакументы, пацвярджаючыя іх занятасць ці наяўнасць падставы для выключэння з базы. Па-другое, на пасяджэнні быў прыняты спіс грамадзян для аплаты па поўным тарыфе паслугі гарачага водазабеспячэння ў першым квартале бягучага года. Спіс перададзены ў райвыканкам для зацвярджэння. Спіс невялікі, у яго трапілі толькі сем грамадзян. Яны мелі дастаткова часу, каб пацвердзіць сваю занятасць, з імі была праведзена вялікая работа па тлумачэнні патрабаванняў Дэкрэта №3, прапанаваны ўсе магчымыя варыянты для пацвярджэння занятасці, але яны ігнаравалі ўсе прапановы ці не могуць пацвердзіць сваю занятасць.

Камісія працягвае сваю работу, бо база незанятых у эканоміцы грамадзян пастаянна ўдакладняецца. Многія грамадзяне былі выключаны з базы на пэўны тэрмін і ім патрэбна зноў пацвердзіць сваю занятасць. Бо спісы на аплату гарачай вады па поўным тарыфе зацвярджаюцца штоквартальна.

Сяргей ЕРМАЛАЕЎ.

Надрукавана ў №19 ад 07.03.2-19 г.