НА ЗДЫМКАХ: на ўчастку добраўпарадкавання працуюць рабочыя Васіль Рылка (уверсе), Іван Лынша і Раман Лелес (унізе).
Параўнальна нядаўна, нарэшце, жыхарам Ганцаўшчыны пашчасціла адчуць ды ўбачыць усе перавагі і прыкметы сапраўднай зімы: вокны размаляваў мароз, а зямлю ўхутаў пушысты снег.
Толькі вось для работнікаў жыллёва-камунальнай гаспадаркі снегапады — гэта не час любавання прыгажосцямі прыроды, а перыяд плённай, напружанай працы. Сітуацыя ўскладняецца і тым, што надвор’е не вылучаецца стабільнасцю: на змену марозу хутка прыходзіць пацяпленне, у выніку чаго — утварэнне галалёду. А потым зноў мароз… Але, як запэўніў намеснік начальніка Ганцавіцкай РЖКГ Сяргей Вайцешык, з праблемамі, што тычыліся б уборкі снегу, гаспадарка пакуль не сутыкнулася.
— Ва ўборцы снегу на вуліцах горада задзейнічаны два пагрузчыкі і тры трактары, — паведаміў Сяргей Канстанцінавіч. — Высыпана каля 50 тон пясчана-салянай сумесі. Акрамя таго, на тратуарах працуюць два міні-трактары — адзін чысціць іх, а другі — пасыпае сумессю. Мы робім усё для таго, каб людзям было зручна, камфортна і бяспечна.
Сяргей Вайцешык таксама адзначыў, што ў выпадку моцнага снегападу на дапамогу РЖКГ прыходзяць сілы і тэхніка арганізацый і прадпрыемстваў горада: за імі замацаваны пэўныя вуліцы. Так, напрыклад, сёлета самастойна ўбіралі снег райспажыўтаварыства, цэнтральная раённая бальніца, ліцэй сельгасвытворчасці.
Тэкст і фота Вікторыі ПРЫКОТЫ.