Узнагароды iнтэлектуалам

Источник материала:

Факт

— З 1997 года мэрыя сталiцы адзначае навучэнцаў за поспехi ў вучобе i творчасцi, — расказала карэспандэнту агенцтва «Мiнск—Навiны» начальнiк упраўлення адукацыi Камiтэта па адукацыi Мiнгарвыканкама Зоя Хахлова. — У мiнулым ўзнагароджанне штогод атрымлiвалi 25 юнакоў i дзяўчат, зараз iх колькасць павялiчылася ўдвая, бо мiнскiя школьнiкi займаюць лiдзiруючыя пазiцыi па вынiках рэспублiканскiх прадметных алiмпiяд на працягу сямi гадоў. Толькi ў гэтым навучальным годзе сталiчнымi эрудытамi заваявана 137 дыпломаў трох ступеняў. У лiку ўзнагароджаных — адзiнаццацiкласнiк гiмназii № 1 Уладзiслаў Парыцкi, выпускнiк 51-й школы Аляксандр Жугроў, вучань 11-га класа гiмназii № 7 Iлья Барысаў.

Кожны з 50 разумнiкаў атрымаў узнагароджанне ў памеры 10 базавых велiчынь.

Галiна МАЛАХОЎСКАЯ, «Мiнск—Навiны».

НА БЫХАЎШЧЫНЕ ВЫМУШАНА СЕЎ САМАЛЁТ

Прама ў полi каля вёскi Абiдавiчы Быхаўскага раёна Магiлёўскай вобласцi вымушаную пасадку зрабiў самалёт. Сведкамi здарэння сталi жыхары вёскi, якiя прымалi ўдзел у апошнiм званку ў мясцовай школе. Яны ж i выклiкалi выратавальнiкаў.

Як паведамiлi «Звяздзе» ў прэс-службе Магiлёўскага абласнога ўпраўлення МНС, самалёт належыць ААТ «Гомельхiмсэрвiс» i займаецца хiмiчнай апрацоўкай палёў. Пры аварыйнай пасадцы самалёт загарэўся, але агонь быў лiквiдаваны пажарнай камандай СВК «Абiдавiчы». У самалёце знаходзiўся толькi пiлот, ён не пацярпеў.

Вядзецца праверка ўсiх абставiнаў здарэння i высвятляецца яго прычына.

Ул. iнф.

АД ГУМАРУ ДА ЭРОТЫКI АДЗIН... РЭКЛАМНЫ РОЛIК

Толькi адзiн дзень, 3 чэрвеня, у канцэртнай зале «Мiнск» будзе паказана незвычайная калекцыя рэкламных ролiкаў «Гумар i эротыка ў сусветнай рэкламе». Да таго, як трапiць у беларускую сталiцу, гэта калекцыя была прадстаўлена на знакамiтых мiжнародных фестывалях LEAF i EPICA Awards.

Як лiчаць арганiзатары паказу, прадстаўнiкi кампанii «Плаза Медыя», акцыя павiнна паспрыяць не толькi далучэнню беларускай грамадскасцi да сусветнага фестывальнага руху, але i павышэнню крэатыўнасцi i якасцi айчыннай рэкламы. Нагадаем, што некалькi разоў у Беларусi з вялiкiм поспехам праходзiла «Ноч паглынальнiкаў рэкламы», i цяперашнi паказ можна назваць яе працягам. Кошт бiлетаў вагаецца ад 6 да 16 тысяч беларускiх рублёў — у залежнасцi ад часу, месца i працягласцi сеанса.

Вiкторыя ЗАХАРАВА.