Не забудзьцеся пра сяўбу

Источник материала:

Рубрыку вядзе Ірына Самулевіч, тэл. 287-18-74

Пад зiму вопытныя агароднiкi высяваюць радыску, бручку, рэпу, буракi, моркву, пятрушку, сельдэрэй, кроп. Часта ўзнiкае пытанне наконт тэрмiнаў пад-зiмняй сяўбы. Да яе прыступаюць позняй восенню, калi глеба прамерзне на 2—3 см, а вось градкi трэба падрыхтаваць загадзя, да замаразкаў.

Тэхналогiя простая: спачатку трэба разрыхлiць глебу, заправiць угнаеннямi. На 1 кв. м патрабуецца 6 кг перагною, 25—30 г фосфарных, 12—15 г калiйных угнаенняў i 0,5 кг драўнiннага попелу. Зямлю неабходна капаць глыбока, паверхню выроўнiваць граблямi, упоперак градак правесцi баразёнкi глыбiнёй да 2,5 см i шырынёй 2—3 см, адлегласць памiж барознамi 12—14 см. У iх высяваюць моркву, пятрушку цi кроп. Пад радыску, рэпу рыхтуюць лункi глыбiнёй 2,5—3 см. Адлегласць памiж iмi залежыць ад агароднiннай культуры. Радыску высяваюць па два насеннi ў лунку, а рэпу — па тры. Перад сяўбой дно баразёнак i лунак трэба прысыпаць слоем сухога пяску. На яго i высяваюць насенне, потым зноў слой сухога пяску (1—1,5 см), астатнюю частку баразёнак i лунак прысыпаюць перагноем цi торфакампостам. Сухi пясок стварае найлепшыя ўмовы для зiмоўкi насення.

ЯК САДЖАЦЬ АЗIМЫ ЧАСНОК

У нашай клiматычнай зоне звычайна яго саджаюць у канцы верасня—пачатку кастрычнiка. Часам тэрмiны некалькi ссоўваюцца. Усё залежыць ад надвор’я. Трэба iмкнуцца пасадзiць азiмы часнок за 5—6 тыдняў да наступлення ўстойлiвых халадоў. Поспех у многiм залежыць ад выбару месца. На градках нi восенню, нi зiмой не павiнна затрымлiвацца вада, iнакш часнок вымакне i загiне.

Пад перакопку трэба ўнесцi добра перапрэлы гной цi кампост (2—4 кг на 1 кв. м), суперфасфат i хлорысты калiй (40 i 10 г на 1 кв. м). Важна таксама не памылiцца з папярэднiкамi. Часнок добра адчувае сябе пасля агурка, капусты, бабовых культур. На старое месца гэтую гароднiну трэба вяртаць не раней чым праз 3—4 гады. Высаджваць часнок неабходна здаровымi буйнымi зубкамi. Глыбiня пасадкi — 5—7 см, адлегласць памiж раслiнамi 6—8 см, а памiж радамi 20—25 см. Пасля пасадкi абавязкова трэба замульчыраваць перагноем цi торфам — два вядры на 1 кв. м.