Медыкi «забракавалi» калекцыю адзення для школьнiкаў

Источник материала:

Яшчэ на этапе распрацоўкi калекцыi школьнага адзення на 2006/2007 навучальны год медыкi выступалi за ўвядзенне адзiнай маркiроўкi штодзённага адзення для школьнiкаў. Галоўным чынам маркiроўка была патрэбная для таго, каб бацькi былi ўпэўненыя, што прапанаваныя мадэлi адпавядаюць санiтарна-гiгiенiчным патрабаванням да школьнага адзення. Але ў вытворцаў гэта iдэя падтрымкi не знайшла...

Самыя жорсткiя гiгiенiчныя патрабаваннi прад’яўляюцца па паказчыку «ўкладанне хiмiчных валокнаў», паколькi школьнае адзенне прызначна для штодзённага карыстання. Дапушчальныя ўкладаннi сiнтэтычных валокнаў i нiтак у тэкстыльных матэрыялах школьнай формы ўсiх узроставых груп не павiнны перавышаць 30—35 працэнтаў у вырабах блузачнага i кашульнага асартыменту i 55 працэнтаў — у вырабах касцюмнага i сукенкавага асартыменту. Падкладка павiнна быць пашытая з натуральных цi штучных валокнаў. Сто працэнтаў укладання сiнтэтычных валокнаў дапускаецца толькi ў блузах, якiя трапляюць у катэгорыю «святочнае адзенне».

Але што ўбачылi работнiкi санiтарнага нагляду ў аддзелах «Адзенне для школьнiкаў» i на школьных кiрмашах? Высветлiлася, што «львiную» долю iх асартыменту складалi блузы для дзяўчынак старэйшага школьнага ўзросту вытворчасцi ЗАТ «Калiнка» i кашулi для хлопчыкаў старэйшага школьнага ўзросту вытворчасцi дзяржынскай фабрыкi «Элiз» i ААТ «Надэкс», у якiх бавоўны было ўсяго 35 працэнтаў i 65 працэнтаў — полiэфiру (ПЭ). Штаны i жылеты Жлобiнскай швейнай фабрыкi, а таксама касцюмы для хлопчыкаў РУП «Бараўчанка» ўвогуле былi пашытыя са 100-працэнтных полiэфiрных тканiн.

У правераных сталiчных магазiнах 78 працэнтаў адзення 40—46-га памераў рэалiзоўвалася з саставам хiмiчных валокнаў у матэрыяле ад 70 да 100 працэнтаў. Цi варта здзiўляцца, што бацькi напярэдаднi навучальнага года лiтаральна «завалiлi» медыкаў шматлiкiмi скаргамi на адсутнасць у продажы дастатковага асартыменту школьнага адзення, якое б па паказчыках гiграскапiчнасцi i паветрапранiкальнасцi адпавядала дзеючым гiгiенiчным нарматывам.

Акрамя таго, у ходзе рэйдавых праверак было ўстаноўлена, што некаторыя прадпрыемствы некарэктна прымяняюць маркiроўку. Для прыкладу, касцюм для дзяўчынкi «нарядный» вытворчасцi фiрмы «Юнона» (94 працэнты ПЭ) i касцюм для школьнiка «нарядный» (100 працэнтаў ПЭ) вытворчасцi ААТ «Славянка» мелi штодзённы выгляд. А касцюмы, штаны i жылеты са 100-працэнтнага полiэфiру з выкарыстаннем 100-працэнтнай полiэфiрнай падкладкi вытворчасцi ЗАТ «Калiнка» мелi маркiроўку «касцюм для школьнiка».

На прайшоўшым нядаўна рабочым пасяджэннi Каардынацыйнага савета па пытаннях увядзення дзелавога стылю адзення ў агульнаадукацыйных установах медыкi таксама ўзнiмалi гэту праблему. Але ў вытворцаў «праўда» свая — па iх меркаванню, школьнае адзенне з натуральных тканiн можа аказацца многiм сем’ям проста не па кiшэнi... Але тут ужо заканамерна паўстае iншае пытанне. Чаму адзенне, якое вытворцы спрабуюць прадаць спажыўцам пад выглядам адзення для школы i якое не адпавядае дзеючым гiгiенiчным нарматывам, рэалiзуецца праз школьныя кiрмашы i аддзелы «Адзенне для школы»?