Вёскi далёкiя i блiзкiя

Источник материала:

— Мы стараемся, каб пенсiянер прыехаў на выбарчы ўчастак i прагаласаваў на месцы. Калi ён пажадае, то яго прывязуць i адвязуць. У перыяд галасавання падключаецца транспарт гаспадарак, аўтапарка ды, калi ёсць неабходнасць, можна наняць i прыватнiка — грошы на гэта ёсць, — растлумачыла Нiна Стасюк, старшыня Камянецкага раённага Савета дэпутатаў, — а ў iншых выпадках скрынка для галасавання дастаўляецца чалавеку ў хату. Выбары — разавая акцыя, i яна праводзiцца не ўпершыню. Але людзi ў далёкiх вёсачках жылi да выбараў i будуць жыць пасля iх. Старыя i нямоглыя ў нас не кiнуты. Аўталаўкi вязуць iм прадукты, сацыяльная служба аказвае дапамогу, дактары таксама наведваюць — значыць, даехаць ёсць магчымасць. Зiмой снег расчышчаецца i транспарт ходзiць. Сапраўды, да кожнай хаты не пад’едзеш, але падысцi можна. Чалавек сам выходзiць на дарогу цi да яго заходзяць. Паўкiламетра — не адлегласць. Хоць вялiкая раскiданасць вёсак мае сваю спецыфiку.

Каб убачыць гэту «спецыфiку», мы наведалi два сельскiя Саветы — Белавежскi i Дзмiтравiцкi.

***
Напачатку падумалася, што ў такiм пасёлку, як Белавежскi, у старшынi Савета мала клопату. Адладжаная iнфраструктура, людзi маюць усе выгоды i атрымлiваюць нармальную зарплату. Мясцовы свiнагадоўчы камбiнат працуе стабiльна, i сярэднi заробак тут 545 тысяч. Ва ўсякiм разе, агароджы кiраўнiку Савета не трэба ставiць самому.

— А чаму Савет павiнен тую агароджу ставiць? — здзiвiлася Алена Хомiч, старшыня пасялковага Савета. — Мы ўжо выйшлi на больш высокi ўзровень — нашы людзi будуюць iх за свой кошт. Неабходна пабялiць дрэвы — бяруць вапну i беляць. Наш чалавек ужо прывык да добраўпарадкаванага жыцця, i калi на вулiцы перагарэла лямпачка, то пацярпець не хоча — мяняй тут жа.

Камбiнат «Белавежскi» Савету дапамагае, але не так, як хацелася б. Можа купiць тую ж вапну, угнаенне для кветак, траву газонную, на свята выдаць ветэранам прэмiю... ды i ўсё. У «Белавежскага» сваiх праблем хапае, да яго далучылi некалькi сельгаскааператываў i ў iх патрэбна ўкласцi грошы.

На тэрыторыi Савета ўсё кампактна, хоць апошнiм часам да яго далучылi дзве вёсачкi. У першай — 9 дамоў i трое жыхароў, а ў другой 47 дамоў i 11 чалавек. Але кiнутых хат няма, iх забiраюць пад дачы. Людзi хочуць жыць па-гарадскому, таму ў пасёлку ўсяго 7 кароў. Навошта трымаць гаспадарку, калi малако i мяса можна атрымаць на камбiнаце.

А турботы, найперш, звязаны з праблемнымi сем’ямi, ды i п’янства даймае...

***

У Iвана Ярашука, старшынi Дзмiтравiцкага сельскага Савета, усё больш сцiпла, бо на яго тэрыторыi 29 вёсак i многiя з iх маланаселеныя — 10—20 чалавек, галоўным чынам, пенсiянеры. А яшчэ 400 пустых хат, з якiмi неабходна разабрацца. Мясцовыя гаспадаркi небагатыя i сельсавету нiчым дапамагчы не могуць. Тым не менш людзям, па магчымасцi, сельскi Савет дапамагае. Сёлета адрамантавана 18 печаў адзiнокiм, а на наступны год запланавана паправiць яшчэ 13.

— У нас п’янства — таксама праблема, — паскардзiўся Iван Iльiч. — I справа не ў гарэлцы, бо цяпер прадаюць тэхнiчны спiрт — разводзяць i збываюць. Безумоўна, барацьбу вядзём, але ж гэта неабходна рабiць сiстэматычна, мэтанакiравана i ў межах усёй рэспублiкi.

Тут ёсць свая ўчастковая бальнiца на 15 ложкаў, i гэты вялiкi плюс неабходна запiсаць на рахунак раённай улады, бо на Камянеччыне працуюць тры ўчастковыя бальнiцы — iх адстаялi.

— Добра было б мець i свайго землеўпарадчыка, — лiчыць Iван Ярашук, — раней так i было. Такi чалавек павiнен знаходзiцца на месцы i валодаць сiтуацыяй.

Што датычыцца выбарчай кампанii, то вылучэнне кандыдатаў фактычна закончылася — кандыдатамi ў дэпутаты, у асноўным, будуць людзi з вышэйшай адукацыяй, хоць ёсць кладаўшчык, прадавец....

Даехаць у аддаленыя вёскi можна будзе без праблем — сельсавет атрымаў новую аўтамашыну.

***

А якiмi хацеў бы бачыць дэпутатаў новага склiкання кiраўнiк райвыканкама Сцяпан Радкавец?

— Хацелася б, каб у Саветы прыйшлi аўтарытэтныя, дзелавыя людзi, бо не ўсе сёння адпавядаюць гэтым патрабаванням. Рэсурс некаторых старшынь сельскiх Саветаў на мяжы. Калi ў дэпутата ёсць амбiцыi i яны накiраваныя на справу, то гэта неабходна вiтаць. Хацелася б, каб Саветы раскрылiся на поўную сiлу.

Сымон СВIСТУНОВIЧ,

Камянецкi раён.