I аператыўна, i цiкава

Источник материала:

— Можна сказаць, што я — даўнi сябра газеты, бо чытаю яе з 12 гадоў. I лiчу, што яна адносiцца па праву да самых лепшых перыядычных выданняў не толькi Рэспублiкi Беларусь, але i краiн СНД. Аб гэтым сведчыць многае, напрыклад, тое, што кожны чытач можа знайсцi ўсё, што яго цiкавiць: i палiтычныя падзеi, i ўнутранае жыццё краiны, i расказы аб працоўных дасягненнях i праблемах розных калектываў, i абагульненнi перадавога вопыту i г.д. Адным словам, правiльна кажуць: чалавеку ўсё вядома, калi «Звязда» ў вашым доме.

Цудоўна, што «Звязда» натхнёна прапагандуе родную мову, не забывае асвятляць багатую гiсторыю краiны, яе культурную спадчыну, надае вялiкую ўвагу малым рэгiёнам, даходзiць да маленькiх вёсак, апiсання абрадаў, звычаяў народа. Напэўна, яна першая газета, якая паслядоўна вядзе тэму развiцця турызму.

Супрацоўнiкi рэдакцыi — дасведчаныя ва ўсiх пытаннях людзi, i з гонарам яны працягваюць справу сваiх папярэднiкаў-журналiстаў, якiя зрабiлi ўсё, каб газета карысталася вялiкiм аўтарытэтам, вялiкай павагай. Нездарма ж яна, адзiная ў рэспублiцы, узнагароджана ордэнам Айчыннай вайны І ступені i ордэнам Працоўнага Чырвонага Сцяга. Нездарма i праспект у сталiцы рэспублiкi названы яе iмем.

Я жадаю сваёй любiмай газеце з нагоды 90-гадовага юбiлею, яе творчаму мабiльнаму калектыву далейшых поспехаў у аператыўным асвятленнi жыцця, больш чытачоў i падпiсчыкаў, уздыму. I хачу сказаць вось што. Газеце «Звязда» — 90 гадоў, а ў нашым раёне ёсць гаспадарка з такой жа назвай, якой 70 гадоў. Дык давайце на агульную карысць цiкава i весела правядзём сумеснае мерапрыемства: газета «Звязда» на свяце ў гаспадаркi «Звязда».