Закаханых запрашаюць салаўiныя ночы

Источник материала:

Акцыi

Грамадская арганiзацыя "Ахова птушак Бацькаўшчыны" (АПБ) сумесна з Мiнскiм гарадскiм камiтэтам прыродных рэсурсаў i аховы навакольнага асяроддзя наладжвае 17—18 мая ў сталiцы акцыю "Салаўiныя ночы". Мэтай акцыi будзе не толькi знаёмства мiнчан з гэтым начным спеваком, але i падлiк колькасцi салаўёў, выяўленне праблем птушак i вызначэнне месцаў iх пражывання.

Прылёт салаўёў у Беларусь з месцаў зiмоўкi ў Паўднёва-Ўсходняй Афрыцы пачынаецца ў апошнiя днi красавiка — пачатку мая, — паведамiў рэдакцыi спецыялiст па экалагiчнай адукацыi АПБ Руслан Шайкiн. — Першымi ў Мiнск прылятаюць самцы. Адразу пасля прылёту яны пачынаюць спяваць. Песня для гэтых невялiкiх птушак мае некалькi значэнняў. Спевамi самцы запрашаюць на выбраны ўчастак будучых сябровак, а таксама паведамляюць iншым салаўям-канкурэнтам аб тым, што гэты ўчастак ужо заняты для гнездавання. Песня салаўёў складаецца з асобных цэльных куплетаў, якiя арнiтолагi называюць каленамi. Звычайна ў песні салаўя не больш за 10 кален, i па iх колькасцi вызначаюць лепшых вакалiстаў. Спевы салаўя ў галiнках квiтнеючай чаромхi напрыканцы дня для закаханых з’яўляецца бадай самым яркiм i рамантычным знакам вясны.

Дзiўна, але ў вялiкiх гарадах ёсць людзi, якiя нiколi не чулi салаўя або не звярталi ўвагi на крылатага вiртуоза. Асабiста я ведаю каля 15 пунктаў у прыватным сектары Мiнска, дзе менавiта цяпер увечары i ранiцай выразна i распазнавальна спяваюць салаўi. У рамках акцыi "Салаўiныя ночы" 17 мая з 10.00 да 16.00 у Цэнтральным батанiчным садзе будзе арганiзавана спецыяльная пляцоўка, на якой можна будзе паслухаць салаўёў, атрымаць квалiфiкаваныя адказы на ўсе пытаннi аб салаўях i iншых птушак ад прафесiйных арнiтолагаў, паназiраць за салаўямi i iншымi вiдамi крылатых. Кожны ўдзельнiк акцыi бясплатна атрымае поўнакаляровы буклет "Салаўiныя ночы" i зможа паназiраць за птушкамi з дапамогай бiнокляў i падзорных труб.

Прыняць удзел у падлiку салаўёў у галоўным мегаполiсе краiны можа кожны мiнчанiн i госць сталiцы. Дзеля гэтага дастаткова наведаць блiжэйшы парк цi сквер i паслухаць салаўёў, звярнуць увагу на гэтых птушак падчас адпачынку. У зялёных раёнах горада гэта магчыма зрабiць непасрэдна з балкона кватэры. Аб месцазнаходжаннi спяваючага салаўя арганiзатары акцыi просяць паведамляць па тэлефонах:

+375 (17) 263 06 13, +375 (17) 263 01 30 (стацыянарныя апараты)

+375 (29) 223 06 13, +375 (29) 101 68 87 (мабiльныя тэлефоны).

Званiць 17—18 мая можна ў любы час сутак, нават уначы.

Пасля апрацоўкi атрыманай iнфармацыi спецыялiсты грамадскай арганiзацыi "Ахова птушак Бацькаўшчыны" плануюць скласцi карту распаўсюджвання гэтых птушак у горадзе, выявiць рэгiёны, дзе салаўi знiклi, а дзе наадварот — з’явiлiся. З дапамогай добрых людзей арнiтолагi змогуць амаль дакладна падлiчыць колькасць салаўёў, якiя жывуць у Мiнску, выявiць, як вагаецца iх колькасць у розныя гады i якiя праблемы сустракаюць птушкi ў буйным горадзе.

Салаўёў у гэтыя выхадныя будуць уважлiва слухаць у сямi населеных пунктах краiны, бо акцыя "Салаўiныя ночы" акрамя сталiцы будзе праведзена таксама ў Слонiме, Кобрыне, Шумiлiне, Мядзелi, Сянно i Жодзiне. У гэтых гарадах кiраваць падлiкам птушак будуць мясцовыя службы АПБ.

Сяргей КУРКАЧ.