Жніво набiрае абароты

Источник материала:

Жнiво iдзе вельмi павольна — гэта датычыцца найперш збожжа, бо, напрыклад, уборка рапсу па вобласцi ўжо завяршаецца. У Бярозаўскiм, Драгiчынскiм, Кобрынскiм i Маларыцкiм раёнах з рапсам, можна сказаць, пастаўлена кропка.

Так было заўсёды — на захадзе Брэстчыны жнiво пачынаецца раней. А адстаюць гаспадаркi Баранавiцкага. Тут убрана ўсяго 30 працэнтаў ад пасеянага. Ураджайнасць рапсу хiстаецца ад 20 ц/га ў Пiнскiм да 28,6 ц/га ў Бярозаўскiм раёнах. Хоць у асобных гаспадарках рапсу намалочваюць i за 40 цэнтнераў. Нават Ганцавiцкi сельгаскааператыў "Агарэвiчы" са сваiм не надта багатымi землямi набiрае ў бункеры па 38,2 ц/га.

Калi з рапсам карцiна ясная, то са збожжам выснову яшчэ рабiць рана, бо жнiво ў большасцi раёнаў толькi набiрае абароты. І зноў жа, Брэстчына i са збожжам падзелена на дзве зоны. На захадзе ўжо ўбрана пад 10 працэнтаў ад пасеянага, ва ўсходнiх раёнах — у межах аднаго.

Што датычыцца ўраджайнасцi, то яна значна вышэйшая, чым у мiнулым годзе, але на пачатку жнiва яно заўсёды так, пад канец уборкi "цэнтнеры" крыху падаюць.

Шэраг раёнаў узялi больш за 40 ц/га, а адарваўся Камянецкi — тут намалацiлi па 43 цэнтнеры з гектара.

На сёння жнiво затрымлiвае найперш надвор’е: не дае магчымасць поўнасцю выкарыстоўваць тэхнiку. Але надвор’е пакрысе наладжваецца.

Адносна нарыхтоўкi кармоў, то тут у параўнаннi з 2007 годам вобласць мiнусуе. Большасць раёнаў з сенам i сенажом адстаюць — мiнулы год быў больш спрыяльны, i перш за ўсё па надвор’і. Але травы ўрадзiлi добрыя.