Наколькі ўзрастуць камунальныя тарыфы?

Источник материала:

Налета рост плацяжоў наўрад цi ўтрымаецца ў межах 5 долараў

У сродках масавай iнфармацыi з’явiлася паведамленне аб iстотным павелiчэннi ў наступным годзе "кватэрных" плацяжоў у Расii. У прыватнасцi, дакладна вядома, што за ацяпленне жыхары расiйскай сталiцы будуць плацiць на 30 працэнтаў больш, чым цяпер. Плата за тэхнiчнае абслугоўванне жылля для масквiчоў узрасце на 20 працэнтаў. Павялiчацца таксама расцэнкi на "цёпленькую", а таксама газазабеспячэння.

У Беларусi на працягу гэтага года камунальныя тарыфы не здолелi ўтрымацца ў межах 5 долараў. Агульнае павелiчэнне склала $9,1— 5 долараў пасля студзеньскага павышэння плацяжоў, i 4,1 долара — пасля майскага "рыўка". Але нават такiя меры не дазволiлi камунальнiкам выйсцi на запланаваны агульны ўзровень кампенсацыi жыхарамi затрат на аказанне жыллёва-камунальных паслуг. Меркавалася, што адпаведны паказчык складзе 32-34 працэнты ад сабекошту, а, паводле апошнiх звестак, паведамiла карэспандэнту "Звязды" начальнiк упраўлення эканомiкi Мiнiстэрства жыллёва-камунальнай гаспадаркi Алена Дудзiнская, лiчба складае 29,4 працэнта.

За тэхнiчнае абслугоўванне жылля жыхары цяпер вяртаюць 39,4 працэнта, цяпло — 25,5, халодную ваду — 34,7, каналiзацыю — 27,7, вываз i абясшкоджванне цвёрдых бытавых адходаў — 43, карыстанне лiфтам — 35,8 працэнта. Як заўважыла Алена Дудзiнская, сёння складана вызначыць, наколькi iстотным будзе павелiчэнне камунальных тарыфаў налета — усё залежыць ад канкрэтнага кошту на пастаўкi палiўна-энергетычных рэсурсаў. Пры гэтым i ў наступным годзе рост тарыфаў наўрад цi ўдасца абмежаваць 5 доларамi. Што ж датычыцца кампенсацыi жыхарамi затрат на аказанне жыллёва-камунальных паслуг, то гэты паказчык налета мяркуецца ўтрымаць на сёлетнiм узроўнi.